Боловсролын яамнаас Элсэлтийн шалгалт болон гүйцэтгэлийн үнэлгээний зохион байгуулалтын талаар мэдээлэл өглөө.
Өмнө нь гүйцэтгэлийн үнэлгээ авахдаа багшийг 3 шалгуур 11 үзүүлэлт, байгууллагын түвшинд 4 шалгуур 12 үзүүлэлтээр үнэлдэг байв.
Нээлттэй санал асуулга, судалгаа шинжилгээнд үндэслэн байгууллага, багшийн шалгуурыг энэ жилээс нэгтгэхээр болжээ.
Тодруулбал байгууллагын гүйцэтгэлийн үнэлгээг хөндлөнгөөс буюу Боловсролын үнэлгээний төвөөс хийнэ.
Харин багшийн үнэлгээг Боловсролын үнэлгээний төвөөс гаргасан аргачлалын дагуу тухайн сургууль, цэцэрлэг өөрсдөө үнэлэх аж.
Байгууллагын гүйцэтгэлийн үнэлгээний тухайд, сургалтын хөтөлбөрийн хэрэгжилт үр дүнг үнэлэхдээ бичгийн шалгалт зохион байгуулдаг.
Ингэхдээ СӨБ-ын хувьд 4, 5 настай буюу ахлах, бэлтгэл бүлгийн хүүхдүүдээс нас, сэтгэхүйн онцлогт нь тохирсон сорил шалгалт авна. 2-3 настай хүүхдийг үнэлгээнд хамруулахгүй аж.
ЕБС-ийн бичгийн шалгалтыг мөн 3-12 дугаар ангийн сурагчдаас авна. 1-2 дугаар ангийн хүүхдүүдийг үнэлгээний шалгалтад хамруулахгүй байх зохицуулалт хийнэ гэв.
Өмнө нь нэг багшийг захирал, сургалтын менежер, нийгмийн ажилтан, заах аргын ахлагч, сурагч, эцэг эх, асран хамгаалагч нар үнэлдэг байсан. Мөн тухайн багш өөрөө өөрийгөө үнэлдэг. Энэ жилээс нэг багшийг зөвхөн сургуулийн үнэлгээний комиссын гишүүд нь бүтэн жилийн ажилд нь тулгуурлан үнэлдэг болох юм.
Сэтгэгдэл бичих