Монгол Улсын Ерөнхийлөгч У.Хүрэлсүхийн санаачилга, дэмжлэгээр барьж буй МУИС-ийн Хууль зүйн сургуулийн барилгыг ирэх оны нэгдүгээр сард бүрэн ашиглалтад хүлээн авна.
Ерөнхийлөгч У.Хүрэлсүх 2022 онд холбогдох яамд, хотын захиргаа, сургуулиудын төлөөллийг хүлээн авч уулзахдаа Хууль зүйн сургуулийн барилгыг барих санаачилга гарган, бүтээн байгуулалтыг нь эхлүүлж байсан. 2024 онд эхэлсэн барилгын I үе шат буюу Б блокийн санхүүжилтийг МУИС гаргаж, А блокийг улсын төсвийн хөрөнгө оруулалтаар барьж байгаа юм. Б блокийн ажил ирэх сард дуусах бол А блок 70 хувьтай байгааг албаныхан мэдэгдлээ. Цогцолбор барилгыг ирэх оны нэгдүгээр сард буюу МУИС-ийг үүсэн байгуулсны 85 жилийн ойгоор ашиглалтад оруулахаар төлөвлөжээ. МУИС-ийн сүүлийн 60 жилийн түүхэнд байгаагүй, оюуны томоохон хөрөнгө оруулалт болох бүтээн байгуулалтыг хугацаанд нь, чанарын өндөр түвшинд гүйцэтгэж дуусгахыг Ерөнхийлөгч У.Хүрэлсүх холбогдох яамд, сургууль, аж ахуйн нэгжүүдийн удирдлагуудад захилаа.
Зургаан давхар энэ барилгад нэг зэрэг 2000 орчим хүн сургалт, судалгааны үйл ажиллагаа явуулах боломжтой. Тухайлбал, 150 хүний суудалтай нэг, 120 хүний суудалтай хоёр, 70 хүний багтаамжтай лекцийн гурав, семинарын 38 танхимтай. Профессор багш нарын судалгааны өрөө, номын сан, автомашины зогсоолтой. Мөн Ерөнхийлөгчийн зарлигаар байгуулсан МУИС-ийн Үндсэн хуулийн эрх зүйн хүрээлэнг энд байрлуулахаар төлөвлөжээ.
Б блокийн барилгын зургийг “Нарлаг хөхий” гаргаж, гүйцэтгэгчээр “Евро-Ази зам”, А блокийн барилгын зургийг “Бум-Асар”, түншлэл, гүйцэтгэгчээр “Хаппи бьюлдинг” компани ажиллаж байна.
Сэтгэгдэл бичих