БНСУ-ын Ерөнхийлөгч Ли Жэ Мён тус улсын иргэд Засгийн газрын зөвшөөрөлгүйгээр Умард Солонгос руу дрон нисгэсэнд харамсаж буйгаа илэрхийлээд, цаашид ийм явдал дахин давтагдахаас сэргийлнэ гэдгийг мэдэгджээ.
"Энэ нь манай засгийн газрын төлөвлөсөн зүйл биш хэдий ч зарим иргэний хариуцлагагүй үйлдлийн улмаас хурцадмал байдал үүссэнд харамсаж буйгаа илэрхийлж байна" гэж тэрбээр Засгийн газрын хуралдаанд үг хэлэхдээ мэдэгджээ.
Өмнөд Солонгосын эрх баригчдын явуулсан мөрдөн шалгах ажиллагааны явцад Үндэсний тагнуулын албаны ажилтан болон цэргийн албан хаагч уг хэрэгт холботой болох нь тогтоогдсон гэж Ли мэдэгдээд, Үндсэн хуулиар хувь хүн БНАСАУ-ын эсрэг аливаа өдөөн хатгасан үйл ажиллагаа явуулахыг хориглодог гэдгийг дурджээ.
Өмнөд Солонгосоос нисгэсэн дронууд манай улсын агаарын хилийг зөрчсөн гэж Пёньян өнгөрсөн нэгдүгээр сард мэдээлээд, үүнийг Сөүлийн зүгээс хийж буй ноцтой өдөөн хатгалга хэмээн буруутгаж байсан юм. Тухайн үед дронуудыг сөнөөсөн гэдгийг Умардын тал мэдэгдэж байв.
Өмнөд Солонгосын тал цагдаа, цэргийн хамтарсан шалгалт явуулсны дараа 30 орчим насны эрэгтэйг зөвшөөрөлгүй дрон нисгэж, агаарын тээврийн болон үндэсний аюулгүй байдлын хуулийг зөрчсөн хэрэгт яллагдагчаар татжээ.
Умард Солонгосын тал сүүлийн саруудад Өмнөд Солонгосыг "хамгийн ихээр дайсагнагч улс" гэж зарлаад байгаа бөгөөд Ли Жэ Мёны засаг захиргаанаас дэвшүүлсэн яриа хэлэлцээ хийх санаачилгуудыг хүлээж авахаас татгалзсаар байгаа юм.
Сэтгэгдэл бичих