УИХ дахь Ардчилсан намын бүлэг өнөөдөр /2026.04.06/ ээлжит хуралдаанаа хийж байна. Тус хуралдаанаар Монгол Улсын Ерөнхийлөгчийн санаачилсан УИХ-ын гишүүнийг эгүүлэн татахтай холбоотой зохицуулалт тусгасан Монгол Улсын Их Хурлын тухай хуульд нэмэлт өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслийг хэлэлцэж байгаа аж.
Хуулийн төслийн танилцуулга мэдээллийг УИХ дахь Ардчилсан намын бүлгийн зөвлөх Л.Дэлгэрмаа, Х.Номингэрэл нар хийжээ.
Монгол Улсын Ерөнхийлөгчийн санаачилсан энэхүү хуулийн төсөлд дараах зохицуулалт тусгасан юм.
ХУУЛИЙН ТӨСӨЛД:
- Гишүүн өргөсөн тангаргаасаа няцсан,
- Гишүүний ёс зүйн дүрмийг ноцтой болон удаа дараа зөрчсөн,
- Гэмт хэрэг үйлдсэн болох нь шүүхийн эцсийн шийдвэрээр тогтоогдсон бол УИХ-ын Ёс зүйн дэд хороо, УИХ-ын нэгдсэн чуулганаар заавал нээлттэй хэлэлцэж, Үндсэн хуулийн Цэцийн шийдвэрээр эгүүлэн татахаар тусгалаа.
Мөн УИХ-ын гишүүн УИХ-ын ээлжит чуулганы хуралдааны 70-аас доошгүй хувьд хүрэлцэн ирсэн, ээлжит чуулганы санал хураалтын 70-аас доошгүй хувьд биечлэн оролцсон байх шаардлагатайг тусгажээ.
Монгол Улсын Их Хурлын тухай хуулийн 7 дугаар зүйлийн 7.2 дахь хэсгийн “ашиг сонирхлын зөрчлөөс ангид байж,” гэсний дараа “ёс зүйн хэм хэмжээг чандлан сахиж,” хэмээн тусгасан юм.
Сэтгэгдэл бичих