Хятадын Ухань хотын авто зам дээр робот таксинууд олноороо доголдож саатан, түгжрэл үүсгэжээ. Мягмар гаригт /2026.03.31/ дор хаяж 100 такси замын голд саатан зогссон нь жолоочгүй тээврийн хэрэгслийн аюулгүй байдлын талаарх маргааныг дахин үүсгэв. Орон нутгийн цагдаа нарын гаргасан анхны дүгнэлтийг харвал уг саатал системийн доголдлоос болсон гэж үзжээ.
Хятадын технологийн аварга "Baidu" компани "Apollo Go" жолоочгүй такси үйлчилгээгээ дэлхийн олон арван хотод явуулдаг. Тус компани 2025 оны арванхоёрдугаар сард "Uber" болон "Lyft" аппликейшнтэй хамтын ажиллагаагаа зарласан. Энэ хүрээнд "Apollo Go" машинуудыг Их Британид явуулахаар зорьж буй бөгөөд энэ ондоо багтаан туршилтыг эхлүүлнэ.
Лондонгийн их сургуулийн профессор Жек Стилго "Жолоочгүй технологи нь жолоочтой машинуудаас аюулгүй байж болох ч сүүлд болсон явдал нь алдаа гарч болохыг харуулж байна. Хэрвээ бид энэ технологийг сонгох гэж байгаа бол шинэ төрлийн эрсдлийг бүрэн ойлгох хэрэгтэй" гэжээ.
Жолоочгүй робот таксинд техникийн бэрхшээл гарсан тохиолдол үүгээр дуусахгүй. Тодруулбал, өнгөрсөн оны арванхоёрдугаар сард Сан Франциско хотод цахилгаан тасарсны улмаас хотын энд тэнд явж байсан "Waymo" таксинууд ажиллагаагүй болж, замын түгжрэл үүсч байв. Үүний зэрэгцээ Хятадын Чунцин хотод зорчигч тээвэрлэж явсан "Apollo Go" такси нүх рүү унасан хэрэг өнгөрсөн оны наймдугаар сард гарчээ.
ЭХ СУРВАЛЖ: BBC
Сэтгэгдэл бичих