ОХУ-ын Цахим хөгжлийн яам "VPN"-ийн хэрэглээтэй дайн зарлаж байгааг сайд Максут Шадаев Даваа гаригт /2026.03.30/ мэдэгдэв. Тус улсын иргэд интернетийн хяналт, цензурыг тойрч гарахын тулд сүүлийн жилүүдэд "VPN" ашиглах нь ихэссэн. Сайд Максут Шадаев "Бид өмнөө тавьсан зорилтуудаа биелүүлэх үүрэгтэй. Энэ тохиолдолд ‘VPN’-ийн хэрэглээг багасгах нь бидний үүрэг юм" гэжээ.
Ерөнхийлөгч Владимир Путин Цахим хөгжлийн яаманд хандаж "VPN"-ийн хэрэглээг хязгаарлах шинэ арга зам бодож олохыг үүрэгдсэн гэх мэдээлэл саяхан гарсан. Үүнийг дагалдаад Цахим хөгжлийн яам дээрх мэдэгдлийг хийжээ.
"VPN"-ийн хэрэглээг хязгаарлах хүчин чармайлтын хүрээнд тавдугаар сарын 1-нээс эхлэн хэрэглэгч сард 15 гигабайтаас дээш гадаад дата хэрэглэвэл нэмэлт төлбөр төлөх журам хэрэгжүүлэхийг санал болгож байна. Өөрөөр хэлбэл, тухайн хэрэглэгчийн гадаадын сервер, цахим хуудас, аппликейшн ашигласан дата нь сард 15 гигабайтаас хэтэрвэл дээрх журам хэрэгжинэ. Мөн "Yandex", "Wildberries" зэрэг технологийн компаниудад хэрэглэгч нь "VPN" ашиглаж байгааг олж илрүүлэх юм бол тэдний платформд хандах эрхийг хязгаарлах үүрэг өгчээ.
Украин дахь дайн эхэлсний дараа Оросын эрх баригчид барууны нийгмийн сүлжээний платформууд болон дотоодын бие даасан мэдээллийн хэрэгслүүдийг хааж эхэлсэн. Үүнээс улбаалаад оросуудын "VPN"-ийн хэрэглээ огцом өсчээ.
ЭХ СУРВАЛЖ: MOSCOW TIMES
Сэтгэгдэл бичих