Прокуророос хүүхдээр тэвчишгүй хөдөлмөр эрхлүүлж, эрүүл мэндэд нь хохирол учруулсан хэрэгт яллах дүгнэлт үйлдэн шүүхэд шилжүүлэв. Тодруулбал, иргэн Б.М, Е.С нар харилцан тохиролцож, Е.С-ийн 11 настай хүүхдээр уралдааны морь унуулж, сар бүр 500 мянган төгрөгийн хөлс олгохоор гэрээ байгуулжээ.
Улмаар тус хүүхдийг 2024 оны дөрөвдүгээр сараас 2025 оны дөрөвдүгээр сар хүртэл хугацаанд Дорнод аймгийн нутаг дэвсгэрт хурдан морь унуулж, эрүүл мэндэд нь хохирол учруулахуйц хөдөлмөр эрхлүүлсэн байна. Хэрэг явдлын улмаас 2025 оны дөрөвдүгээр сарын 19-ний өдөр хүүхдийг хориглосон цаг хугацаанд хамгаалах хэрэгсэлгүйгээр морь унуулахад мориноос унаж, эрүүл мэндэд нь хүндэвтэр хохирол учирчээ.
Иймд прокуророос уг үйлдлийг Эрүүгийн хуулийн 16.10 дугаар зүйлийн 1 дэх хэсэгт заасан “хүүхдээр тэвчишгүй хөдөлмөр эрхлүүлэх”, мөн 11.5 дугаар зүйлийн 1 дэх хэсэгт заасан “хүний эрүүл мэндэд хүндэвтэр хохирол болгоомжгүйгээр учруулах” гэмт хэрэгт тооцон яллах дүгнэлт үйлдэж, Дорнод аймаг дахь сум дундын эрүүгийн хэргийн анхан шатны шүүхэд шилжүүлсэн байна. Хуулийн дагуу дээрх төрлийн гэмт хэрэгт торгох, нийтэд тустай ажил хийлгэх, зорчих эрхийг хязгаарлах, эсхүл хорих ял оногдуулах боломжтой юм.
Сэтгэгдэл бичих