Туулын хурдны замын зургийг төсөл хэрэгжүүлэгчийн зүгээс ирүүлээгүй байгаа учир Усны газраас уг төсөлд мэргэжлийн дүгнэлтийг гаргаагүй байгаа аж. Иймд өнгөрсөн Пүрэв гарагт Усны зөвлөлийг хуралдуулж уг төслийн танилцуулгыг сонссон байна. Энэ үеэр дараах үндсэн гурван асуудал анхаарал татсаныг Усны газрын дарга З.Батбаяр танилцууллаа. 

---

1. Туулын хурдны замыг барьсан тохиолдолд үерийн аюул хэрхэн нэмэгдэхийг тооцоолох шаардлагатай

Туул голын усан цогцолбор нь үерийн хамгаалалтын үүргийг гүйцэтгэх ёстой аж. Туул голын хойд хэсгээр 1966 оны үерийн дараа баригдсан үерийн хамгаалалт тодорхой цэгүүд дээр байхгүй болсон байна. Үүнийг сэргээн засварлаж байж дараагийн ажлыг хийх ёстой гэв. Иймд Туулын хурдны замыг барьсан тохиолдолд үерийн аюул хэрхэн нэмэгдэхийг тооцоолох шаардлагатайг онцоллоо. 

2.Газрын доорх ус болон Туул голын сэвсгэр хурдсанд нөлөөлөх нөлөөлөл нь тодорхойгүй байна

Нийт гүүрний 2,574 тулгуураас 18 тулгуурыг голдиролд 2,556 тулгуурын голын татам хэсэгт хийх аж. Төсөл хэрэгжүүлэгчийн зүгээс хэдхэн багана нь усан дотор байна бусад нь хамаагүй гэж бодож байвал алдаа болно гэдгийг тэрбээр онцлов.

Учир нь татмын хэсгийн бүх тулгуурыг авч үзвэл 13-25 метрийн гүнтэй 2,556 цооногийг өрөмдөж цемент суулгана. Энэ тохиолдолд Туул гол буюу газрын доорх усанд, голын сэвсгэр хурдсанд хэрхэн нөлөөлөх талаар тооцоолол байхгүй байна гэж Усны нөөцийн зөвлөл дүгнэсэн байна. Багана тус бүр нь хаана байрлаж байгаагаасаа шалтгаалж сэвсгэр хурдсанд өөр өөр нөлөөлөл үзүүлэх учир ажлын зургийг харах зайлшгүй хэрэгтэй байгаа аж. Гэтэл ажлын зураг хараахан гараагүй байна. Тухайн үедээ танилцуулаад явна гэж төсөл хэрэгжүүлэгчийн зүгээс хэлж байгаа аж. 

Газрын доорх ус болон Туул голд нөлөөлөх нөлөөллийг өмнө нь зайлшгүй тодорхойлсон байх ёстой учир ажлын зургийг тасралтгүй шаардаж байгаа гэв.  

3. 7.2 км урттай гүүр нь ямар бохирдлын аюул учруулж болох талаар тодорхой судалгаа алга 

Усны нөөцийн зөвлөлийн гишүүд төсөл хэрэгжүүлэгчээс  Туул гол дээгүүр тавигдах 7.2 км урттай гүүр нь ямар бохирдлын аюул учруулж болох талаар тодорхой судалгаа, нөлөөллийг гаргаж ирсэн байхыг шаардсан байна. 

Туул гол нь 2008 онд дэлхийн хамгийн бохирдолтой 10 голын нэгээр нэрлэгдэж байсан ба түүнээс хойш бохирдол улам нэмэгдэж байгаа гэв. Иймд Туул голд үзүүлэх чанарын нөлөөллийг тодорхойлох шаардлагатай гэж үзжээ. 

Дээрх мэдээллүүд дутуу учир Усны нөөцийн зөвлөлөөс төсөл хэрэгжүүлэгчийн зүгээс гаргасан танилцуулга дээр тодорхой санал, дүгнэлт гаргах боломжгүй байна гэж үзсэн байна. Иймд дээрх асуудлуудаа тодорхой болгох үүргийг өгчээ.