УИХ дахь МАН-ын бүлгийн хуралдааныг өнөөдөр /2026.03.26/ 14:00 цагт товлосон бөгөөд тус хуралд Ерөнхий сайд Г.Занданшатар оролцож байна.
УИХ-ын чуулганы нэгдсэн хуралдаан өнөөдөр хоёр дахь долоо хоногтоо хуралдаж чадахгүй гацаанд орсон. Иймд энэ асуудлыг хэлэлцэхээр УИХ дахь МАН-ын бүлэг ээлжит бус хуралдааныг зарласан юм. Тус бүлэг 68 гишүүнтэй, Засгийн газарт ИЗНН, ХҮН намууд хамтарч байгаа бөгөөд 12 гишүүнтэй. Нийлээд 80 гишүүн УИХ-ын чуулганы нэгдсэн хуралдааныг хийх бүрэн боломжтой ч УИХ дахь МАН-ын бүлэг хоёр хуваагдсанаас ирц 50 хувьд хүрч чадахгүй байгаа юм. Иймд энэ асуудлыг хэрхэн шийдвэрлэх талаар ярилцах юм.
УИХ дахь Ардчилсан намын бүлэг 42 гишүүнтэй. Тус намын бүлэг УИХ-ыг МАН-ын дарга удирдах ёсгүй гэх шаардлага тавин, чуулганы хуралдаанд оролцохгүйгээ мэдэгдсээр байгаа. Үндэсний эвслийн хувьд дөрвөн гишүүнтэй бөгөөд эрх баригч нам өөрсдөө ирцээ бүрдүүлээд явах ёстой гэдэг асуудлыг хөндөж буй.
Нэг ёсны УИХ-ын дарга Н.Учралын хувьд нэг бол МАН-ын даргын албаа сонгоод УИХ-ын даргаасаа чөлөөлөгдөх, эсхүл МАН-ын даргаасаа буугаад УИХ-ын даргаараа үлдэх. Хэрэв МАН-ын дарга байх сонголт дээрээ үлдэх бол Засгийн газраа удирддаг жишгээ дагах болж буй. Энэ тохиолдолд Ерөнхий сайд Г.Занданшатар чөлөөлөгдөхөөс аргагүй нөхцөл байдалд орж байгаа юм.
Эх сурвалж: news.mn
Сэтгэгдэл бичих