Дэлхийн усны өдрийг тохиолдуулан “Ус ба тэгш эрх” сэдвийн хүрээнд уулзалт, хэлэлцүүлэг Улаанбаатар хотноо зохион байгууллаа.
Хэлэлцүүлгийг Байгаль орчин, уур амьсгалын өөрчлөлтийн яам, Усны газар, НҮБ-ын Хүүхдийн сан (UNICEF)-тай хамтран зохион байгуулж, төр, олон улсын байгууллага, хувийн хэвшил, судлаачид оролцов. Энэ удаагийн хэлэлцүүлэг нь Монгол Улсын усны нөөцийн жигд хуваарилалтыг хангах, уур амьсгалын өөрчлөлтөд дасан зохицсон менежментийг хэрэгжүүлэх, экосистемийн тэнцвэрт байдлыг хадгалах бодлогын хэрэгжилтийг олон нийтэд таниулахад чиглэж буйгаараа онцлогтой. Мөн ус ашиглалтын тэгш бус байдлыг бууруулах, усны нөөцийг хамгаалах, зүй зохистой ашиглах хандлагыг төлөвшүүлэхэд анхаарал хандуулах юм.
Хэлэлцүүлгийн үеэр Монгол Улсын усны нөөцийн өнөөгийн нөхцөл байдал, ус хангамж, ариун цэвэр, эрүүл ахуйн салбарын бодлого, боловсролын байгууллагын усны хүртээмж, олон улсын байгууллагуудын хэрэгжүүлж буй хөтөлбөр, төслүүдийг танилцууллаа. Тухайлбал, НҮБ-ын Хүүхдийн сан, Дэлхийн Эрүүл Мэндийн Байгууллага, “The Nature Conservancy” байгууллагаас хэрэгжүүлж буй ус хамгааллын санаачилгуудыг танилцуулгыг дурдаж болно. Мөн УИХ-ын гишүүн Л.Мөнхбаясгаланг “Усны элч”-ээр өргөмжилж, усны нөөцийг хамгаалах үйлсэд хувь нэмэр оруулж буй байгууллага, иргэдийг урамшууллаа.
Усны нөөцийн тогтвортой байдлыг хангах нь зөвхөн байгаль орчны асуудал бус нийгэм, эдийн засгийн хөгжлийн суурь нөхцөл билээ. Үүний хүрээнд экосистемийн тэнцвэрт байдлыг хадгалах, цөлжилтийг сааруулах, усны нөөцийг бүс нутгийн онцлогт нийцүүлэн жигд хуваарилах нь чухал юм. Ялангуяа говь, тал хээрийн бүсийн ус хангамжийг сайжруулах, хот суурин газрын усны хэрэгцээг тогтвортой хангахын тулд усны хуримтлал бий болгох, усны нөөцийг дахин ашиглах бодлого, шийдлүүдийг эрчимжүүлэх шаардлагатай байгааг албаныхан цохон тэмдэглэж байна. Усны газрын дарга З.Батбаярын илтгэлд нийслэлд 210 метр тутамд нэг худаг байгаа нь сэтгэл түгшээж байгааг дурдаад үүнийг зогсоох ёстойг хэллээ. Өөрөөр хэлбэл, нийслэлийн хэмжээнд 81.572 худаг байгаа аж. Тэгвэл улсын хэмжээнд 6932 гол, мөрөн, 4732 нуур, тойром, 15.165 булаг шанд, 645 рашаан, 350 усны сан, хөв цөөрөм байгааг судалгаанд дурдсан байна.
Дэлхийн усны өдрийг жил бүрийн гуравдугаар сарын 22-ны өдөр тэмдэглэдэг бөгөөд энэ удаа “Ус ба тэгш эрх” уриаг дэвшүүлжээ. Энэхүү уриа нь хүн бүр усны нөөцөд тэгш хүртээмжтэй байх, усны нөөцийг шударга, үр ашигтай удирдах шаардлагатайг онцолж байна.
Сэтгэгдэл бичих