Гадаад харилцааны яамны Төрийн нарийн бичгийн дарга Л.Мөнхтүшиг энэ сарын 19-нд Цөлжилттэй тэмцэх тухай НҮБ-ын конвенцын Гүйцэтгэх нарийн бичгийн даргын орлогч Андреа Меза Мурильог хүлээн авч уулзав.
Уулзалтын үеэр талууд Цөлжилттэй тэмцэх тухай НҮБ-ын конвенцын Талуудын 17 дугаар бага хурлын бэлтгэл ажлын явцын талаар санал солилцож, тус бага хурлыг зохион байгуулах бэлтгэлийг хангах хүрээнд хамтын ажиллагааг идэвхжүүлэхийн чухлыг онцлов. Мөн энэ удаагийн Талуудын бага хурлын даргаар Гадаад харилцааны сайд Б.Батцэцэг ажиллахаар болсон нь хурлыг амжилттай зохион байгуулахад чухал үүрэг гүйцэтгэнэ хэмээн итгэж буйгаа Конвенцын Гүйцэтгэх нарийн бичгийн даргын орлогч Андреа Меза Мурильо илэрхийллээ.
Улаанбаатар хотноо энэ оны наймдугаар сарын 17-28-нд “Эх байгалиа сэргээе, итгэл найдвараа бадраая” уриан дор зохион байгуулах энэ удаагийн бага хурал нь газрын доройтол, цөлжилт, гангийн асуудлыг шийдвэрлэхэд чиглэсэн олон улсын хамтын ажиллагааг бэхжүүлэх, бодлогын өндөр түвшний хэлэлцүүлгийг өрнүүлэх чухал ач холбогдолтой гэж ГХЯ-наас мэдээллээ.
Сэтгэгдэл бичих