Хэрэглээний зээлийг хумих бодлогыг Монголбанк авч хэрэгжүүлэн, хэрэглээний зээлийн өр, орлогын харьцааг 45/55 хувь болгон өөрчилсөн юм.
Ингэснээр та банкнаас хэрэглээний зээл авах бол нийт орлогынхоо 45 хүртэл хувьтай тэнцэх хэмжээний зээл авах боломжтой. Үүний үр дүн гарч, автомашины, цалингийн, тэтгэврийн зээл багасжээ.
Харин ББСБ-уудын зээлийн нийт хэмжээ өссөөр байна. ББСБ-аас зээл авахад 55/45 гэсэн харьцааг мөрддөг. ББСБ-уудын зээлийн дундаж хүү 3.5 хувь буюу банкуудынхаас өндөр байна.
Банкууд болон ББСБ-ын хэрэглээний зээл олгохдоо мөрдөж буй өр, орлогын харьцаа даруй арван нэгжээр ялгаатай байгааг Монголын банкны холбооны гүйцэтгэх захирал Л.Амар онцлов. Энэ ялгаа ББСБ-уудыг дэмжиж байна гэсэн юм.
Ингэснээр иргэд илүү хямд зээл авах боломж нь хязгаарлагдаж, ББСБ, хадгаламж зээлийн хоршооноос илүү өндөр хүүтэй зээл авч байна. Ер нь санхүүгийн зах зээлийг Монголбанк, Санхүүгийн зохицуулах хороо гэсэн хоёр байгууллага тусдаа удирдаж байгааг нэгтгэх, нэг тоглоомын дүрэмтэй болох цаг болсон гэв.
Нэг салбар атлаа хоёр өөр зохицуулагчтай, өөр өөр бодлоготой байгааг шийдэх хэрэгтэй гэсэн юм.
СЗХ-ны цахим хуудсанд мэдээлснээр манай улсад 575 ББСБ бий. Тэдний зээлдэгчийн тоо 2.6 саяд хүрч, өмнөх оныхоос 43 хувиар өсжээ. ББСБ-уудын цэвэр ашиг 2025 онд 946 тэрбум төгрөгт хүрч, өмнөх оныхоос хоёр дахин өссөн байна.
Сэтгэгдэл бичих