Өмнөд Солонгосын ерөнхийлөгч Ли Жэ Мён Лхагва гаригт Ёнсан дүүрэг дэх ерөнхийлөгчийн оффисын үүдэнд машинаас буухдаа утасгүй чихэвчээ авч, хайрцаг руу нь хийсэн нь олны анхаарлыг татжээ. Яагаад гэвэл энэ нь Өмнөд Солонгосын улс төрийн хүрээллийнхний хувьд ховор үзэгдэл аж. Төрийн тэргүүнүүд дипломат арга хэмжээний үеэр орчуулгын зорилгоор л чихэвч зүүдэг. Өдөр тутамдаа чихэвч зүүсэн харагдах нь ховор.
Тиймээс Ли Жэ Мёны чихэвч тэр дороо л трэнд болох шинжтэй.
Лигийн сонгуулийн кампанит ажлын үеэр өмссөн байсан пүүз цахим ертөнцөд "од" болсноор зарагддаг дэлгүүрүүд нь нөөцөө шавхсан явдал болсон. Үүнээс улбаалаад "Lee goods" буюу "Лигийн хэрэглэдэг бүтээгдэхүүн" гэсэн утгатай хэллэг хүртэл гарсан байна. Түүний чихэвч дараагийн "Lee goods" болж магадгүй гэх таамаглал гарч ирэв.
Технологийн салбарынхны таамаглаж буйгаар Лигийн чихэвч "Apple"-ын 2022 оны есдүгээр сард худалдаанд гарсан "AirPods Pro 2" бололтой. Энэхүү чихэвч нь орчны дуу чимээг маш сайн тусгаарладаг. АНУ-ын Хүнс, эмийн бүтээгдэхүүний захиргаа өнгөрсөн онд тус чихэвчийг сонсголын аппарат хэлбэрээр ашиглахыг зөвшөөрсөн юм.
Ли Жэ Мён "Apple"-ын бүтээгдэхүүнд дуртай гэдгээ эртнээс мэдэгдсээр ирсэн. Тэрбээр 2016 онд Соннам хотын даргаар ажиллаж байхдаа анх "iPhone" хэрэглэж эхэлжээ. "iPhone"-ыг тагнаж чагнах аюулын эсрэг аюулгүй бүтээгдэхүүн гэж тэр үздэг.
Сонирхуулахад, Ли Жэ Мён нь "YouTube"-ын "Gold Creator" батламжтай Өмнөд Солонгосын анхны улстөрч юм. Түүний технологийн мэдлэгтэй дүр төрх, өдөр тутамдаа орчин үеийн техник технологийг ашигладаг зэргийг харгалзан үзвэл "AirPods Pro 2" чихэвч дэмжигчдийнх нь зайлшгүй худалдаж авах ёстой бүтээгдэхүүн ч болж мэдэх юм.
ЭХ СУРВАЛЖ: KOREA TIMES
Сэтгэгдэл бичих