Хойд Солонгосын суртал ухуулга орчин үежиж, ахисан түвшинд гарсан бололтой. Тодруулбал, тус улсын төрийн хэвлэл "KCNA" агентлаг өнөөдөр /2025.05.19/ удирдагч Ким Жон Уны нэгэн зургийг нийтэлсэн юм. Тус зургийг Өмнөд Солонгосын "Korea Herald" хэвлэл инстаграмын хэв маягтай зураг гэж нэрлэжээ.
Ким Жон Уны ментор асан Хёон Чол Хэ 2022 оны тавдугаар сарын 19-нд нас барсан. Түүний нас барсны ойг тохиолдуулан Ким Жон Ун Пёньяны Эх орончдын оршуулгын газар дахь булшинд нь цэцэг өргөсөн бөгөөд энэ үеийн зургийг "KCNA" нийтэлжээ. Зургийг харвал Ким ганц ширхэг улаан сарнай бариад булшны өмнө сөхрөн суужээ. Мөн ганц сарнайг булшин дээр тавьсан зургийг ойроос урлагтайгаар авсан байна.
Хёон Чол Хэ нь удирдагч агсан Ким Жон Илийн ойрын туслах байсан эрхэм юм. Тэрээр Ким Жон Уныг удирдагч болоход бага залуугаас нь бэлтгэсэн гэдэг. Түүний талаар Ким Жон Ун хэлэхдээ "Нөхөр Хёон Чол Хэ агуу генералын дэргэд үргэлж байсан. Тэрээр генералын сүүдэр мэт байсан бөгөөд үүрд мөнх орших болно" гэжээ.
Сэтгэгдэл бичих