Хүйтний эрч чангарч байгаа энэ үед нийслэлийн ДЦС-уудад очих нүүрс тээвэрлэлтийг хэрхэн зохион байгуулж байгаа талаар УБТЗ-ын “Улаанбаатар” өртөөний дарга Б.Удамбуянаас асууж тодрууллаа.
"УБТЗ-ын “Улаанбаатар” өртөө нийслэлийн 1600 мянган хүнийг цахилгаан дулаанаар хангахад чухал үүргийг гүйцэтгэдэг. Тус өртөө нь хоног тутам дунджаар 300-350 вагон буюу 15,000-25.000 тонн нүүрсийг Багануур, Шивээ овоогийн уурхайгаас тээвэрлэж 3 болон 4 дүгээр дулааны цахилгаан станцууд/ДЦС/-ад нийлүүлдэг. Зөвхөн өнөөдөр л гэхэд 267 вагоныг бэлдэж Багануур, Шивээ овоогийн нүүрсний ачилтад явуулаад байна. Өвлийн ид ачааллын үед ДЦС-уудын найдвартай ажиллагааг хангахад УБТЗ-ын зүгээс онцгой анхаарч, энэ оны арваннэгдүгээр сарын 5-наас ирэх оны гуравдугаар сарын 1-нийг хүртэл эрчим хүчний нүүрсний тээврийг хатуу цагийн хуваарийн дагуу зохион байгуулж байна.
Ийнхүү нүүрсний тээвэрлэлтийг УБТЗ тасралтгүй найдвартай зохион байгуулсны үр дүнд ДЦС-3, ДЦС-4 18-24 хоногийн нүүрсний нөөцтэй болоод байна" гэж хариуллаа.
Түүнчлэн, “Улаанбаатар” өртөөнөөс гадна УБТЗ-ын бусад өртөө Дархан, Эрдэнэт зэрэг томоохон хотуудад хүргэх нүүрс тээвэрлэлтийг зохион байгуулан ажилдаг юм байна.
“УБТЗ” ХНН
Сэтгэгдэл бичих