Халдварт өвчин судлалын үндэсний төвөөс өнөөдөр ээлжит мэдээллээ хийв.
Нийслэлийн хэмжээнд амбулаторийн 132 мянган үзлэг хийснээс 8800 орчим томуу, томуу төст өвчний тохиолдол аж. Энэ нь нийт үзлэгийн 6.6 хувийг эзэлж байгаа бөгөөд өнгөрсөн долоо хоногийн дунджаас 0.3 хувиар өсжээ. Насаар нь ангилбал 0-1 ойтой хүүхдүүд 21.8, 2-4 ойтой хүүхдүүд 23.1, 5-9 насныхан 18.9 хувийг эзэлж байна. Өнгөрсөн долоо хоногт Нийслэлийн түргэн тусламжийн төвд 11 мянга гаруй дуудлага ирсний 13.7 хувь нь томуу, томуу төст өвчтэй хүүхдийнх аж. Зөвхөн амралтын өдрүүдэд л гэхэд 3000 орчим хүүхэд амбулаториор үзүүлжээ. Тиймээс Нийслэлийн эрүүл мэндийн газраас яаралтай тусламж дээр ажиллах хүний нөөцийн хүчин чадлыг нэмэгдүүлсэн байна.
ЭХЭМҮТ-ийн Уушгины эмгэг судлалын эмч Б.Гүен хэлэхдээ, “Томуу, томуу төст өвчнөөр бүх насныхан өвчлөх эрсдэлтэй. Цэцэрлэг, сургуулийн насны хүүхдүүд томуу, томуу төст өвчнөөр өвчлөх магадлал хүйтэн сэрүүний улиралд өндөр түвшинд очдог. Тэр дундаа 0-5 насны хавсарсан суурь эмгэгтэй, суурь өвчтэй хүүхдэд илүү хүнд тусдаг онцлогтой. Амьсгалын цочмог дутагдал үүсгэх, хоёр уушгинд хатгалгаа үүсэх, амьсгалын хямрал үүсгэх аюултай агаар дуслын замаар дамждаг халдвар юм. ЭХЭМҮТ-ийн Хүүхдийн эмнэлгийн хүлээн авах яаралтай тасагт 0-18 насны 66 хүүхэд уушгины хатгалгаагаар хэвтэн эмчлүүлж байна. Ирж байгаа хүүхдүүдээс харахад амьсгалын замын цочмог халдварын шинж тэмдэг зонхилж байна.
Халдварын шинж тэмдэг нь, их халуурах, нус гоожих, хамар битүүрэх, хоолой өвдөх, толгой өвдөх, булчин шөрмөс янгинах, сульдаж ядрах зэрэг юм. Гэрийн нөхцөлд ердийнхөөс илүү шингэн зүйл уулгах ёстой. Халуурч байгаа хүүхдийн хоолны дуршил буурдаг. Тиймээс халууныг нь буулгасны дараа хэвийн нөхцөлд иддэг байсан хэмжээгээр нь хооллохыг зөвлөе. Түргэн шингэхүйц шөлтэй хоол идүүлэхийг эрмэлзээрэй. Эрт унтуулж амраах хэрэгтэй” хэмээн зөвлөв.
Сэтгэгдэл бичих