АН: Улс төрийн намын тухай хуулийг мөрдөх хугацааг хойшлуулахгүй

Өнөөдөр УИХ дахь намын бүлгүүд хуралдсан юм.

Улсын Их Хурал дахь Ардчилсан намын бүлгийн ээлжит хурлаар 2024.11.22-ны өдөр Засгийн газраас өргөн мэдүүлсэн Улс төрийн намын тухай хууль, /Шинэчилсэн найруулга/-ийг дагаж мөрдөх журмын тухай хуульд өөрчлөлт оруулах тухай хуулийн төслийг хэлэлцжээ. Тус бүлэг төслийг дэмжих боломжгүй гэж үзлээ.

Улс төрийн намын тухай хуулийг хэрэгжилтийг 2027 он хүртэл хойшлуулах шалтгааныг хууль санаачлагчид нь өөрсдөө ч тайлбарлаж чадахгүй байгаа гэв. Улс төрийн намын тухай хуулийг өнгөрсөн оны долдугаар сарын 7-нд баталсан. Хэрэгжилт нь 2025 оны нэгдүгээр сараас эхэлнэ. Гэвч уг хуулийн хэрэгжих хугацааг 2027 он хүртэл хойшлуулахыг АН-ын бүлэг дэмжсэнгүй.

Засгийн газраас хуулийн төслийг яаралтай горимоор оруулжээ.  

АН-ын бүлгийн дарга О.Цогтгэрэл дараах мэдээллийг өглөө:

-Манай улсад сүүлийн 30 жилд болж бүтэхгүй олон асуудал байсан нь улс төрийн намтай холбоотой. Намуудад ил, далд санхүүжилт байна. Дотоод ардчилал байхгүй, авилга их байна. Хариуцлагын тогтолцоо байхгүй байна. Энэ бүхнийг залруулахын тулд Улс төрийн намын тухай хуулийг баталсан. Гэтэл хэрэгжилтийг 2027 оны наймдугаар сараас эхлүүлнэ гэв.

Бид энэ хуульд ихээхэн ач холбогдол өгч, ярилцлаа. Бүлгийн  хуралд 31 гишүүн оролцсоноос 18 гишүүн дэмжсэнгүй. Хуулийн хэрэгжилтийг хойшлуулах шаардлагагүй гэж үзлээ.

Бид хуулийн дор амьдрах ёстой болохоос биш хуулийн дээр гарч, өөрсдөдөө хуулийг тааруулан засах ёсгүй. Улс төрийн намууд үлдсэн нэг сарын дотор дүрмээ өөрчилж амжихгүй. Иймд хугацааг хойшлуулах төслийг боловсруулжээ.

Хуулийг  нэг жил хагасын өмнө баталсан, хэрэгжих хугацааг тов тодорхой заасан. Намууд бүтэц, зохион байгуулалтаа шинэчилж амжихгүй бол хуулийн хэрэгжилтийг нэг сараар ч юм уу хойшлуулж болно. Гэтэл бүтэн хоёр жилээр сунгахыг эсэргүүцлээ. Хуулийн төсөл санаачлагчид хүндэтгэх тайлбар хэлээгүй. Хэн ч байсан хуулийг дагах үүрэгтэй. Намууд хамтарсан тул энэ хуулийг яасан ч яах вэ гэж болохгүй. Манай нам хуулийг хэрэгжүүлэх бүрэн боломжтой гэв.          

Улс төрийн намын тухай хуульд зааснаар намууд санхүүчтэй болох, төрийн  аудитаар хянуулах үүрэг хүлээжээ.