Вьетнам улс энэ жил анх удаа "BRICS"-ын чуулганд оролцжээ. Энэ үеэр тус улсын ерөнхий сайд Фам Мин Чин Орос, Хятадын удирдагчидтай уулзсан боловч "BRICS"-т элсэх сонирхолтой байна гэж ам нээгээгүй. Хэрвээ Вьетнам улс бүлэгт элсвэл Орос, Хятадтай харилцаагаа зузааруулах ч гэлээ АНУ-тай харилцах харилцаа нь доголдох магадлалтай.
Вьетнамын засгийн газрын мэдэгдэлд "Бүлгийн орнууд болон олон улсын хамтын нийгэмлэгтэй хамтран ажиллаж, бүх нийтэд ээлтэй сайн сайхан ертөнцийг байгуулах санаагаа хэрэгжүүлэхэд Вьетнам бэлэн байгааг ерөнхий сайд Чин нотоллоо" гэжээ.
Дээд хэмжээний уулзалт эхлэхээс гурав хоногийн өмнө "Вьетнам улс бүлэгт элсэх сонирхолтой байгаа ч хугацаа нь тодорхойгүй байна" гэж тус улсын албаны эх сурвалж мэдээлж байжээ. "BRICS"-ын гишүүн орны нэр нь үл мэдэгдэх эх сурвалж ч бас үүнтэй ижил төстэй мэдэгдэл хийсэн. Уулзалтын эцсийн тунхаглалд гишүүд "Түнш орны ангилал"-ыг дэмжсэн гэх боловч дэлгэрэнгүй мэдээлэл өгөөгүй.
Бүлэгт элсэх хүсэлтэй 30 гаруй улс байгааг Путин мэдэгдсэн. Гэхдээ ямар нөхцөл болзолтой нь тодорхойгүй.
Дашрамд дурдахад, Вьетнам улс хэдийнэ "BRICS"-ын гишүүн орнуудтай хүчтэй харилцаатай. ОХУ нь түүхийн туршид Вьетнамын шилдэг зэвсэг нийлүүлэгч байсан бол Хятадтай эдийн засгийн хувьд түншилдэг.
ЭХ СУРВАЛЖ: REUTERS
Сэтгэгдэл бичих