Аймгийн цагдаагийн даргыг Хууль зүй дотоод хэргийн сайд нь томилдогоос Засаг дарга аа хулгайч гэж харах хүртлээ үгэнд орохгүй болж томорсон тухай УИХ-ын гишүүн О.Амгаланбаатар мэдэгдлээ.
Энэ талаар тэрбээр “Нэг хүнд зориулж яам байгуулдаг. Тэр яамыг байгуулсан сайд нь өөртөө зориулаад босоо бүтцийг угсардаг. Аймагт байдаг 26 байгууллагын удирдлагын 24-ийг нь босоогоор томилдог. Аймгийн Засаг дарга нь цагдаагаа мэдэхгүй. Суманд гэмт хэрэг гарлаа, малын хулгай гарлаа гэхэд энэ тухай сумын хэсгийн төлөөлөгч, аймгийн цагдаагийн даргад хэлэхэд халаасандаа гараа хийсэн нөхөр. “Танд хамаа байхгүй, бид босоо удирдлагатай” гэдэг асуудал ярьдаг.
Ард иргэдээ амар тайван амьдруулах нь аймгийн Засаг даргын үндсэн үүрэг. Гэтэл аймгийн цагдаагийн дарга нь аймгийн Засаг даргаа хулгай хийчиж магадгүй гээд эсрэг нь, сумын хэсгийн төлөөлөгч нь сумынхаа Засаг даргын мөн эсрэг. Угтаа бол энэ хоёр нөхөр нийлээд яаж гэмт хэргийн гаралтыг бууруулах вэ, яавал гэмт хэргээс урьдчилан сэргийлэх вэ гээд нэг гар болоод хөтлөлцөөд ажиллах ёстой байтал аймгийн Цагдаагийн дарга нь Засаг даргаа хулгайч гээд харчихсан эсрэг нь яваад байж таарахгүй.
Сүүлийн 20 жилд Улаанбаатар төвтэй Монгол Улсыг эрчимтэйгээр байгуулсан. Хэнд халамж хэрэгтэй вэ гэдгийг хамгийн сайн мэдэх хүн бол сум, аймгийн Засаг дарга. Гэтэл эрх мэдэл байхгүй. Дээрээс хуваарилж өгсөн төсвийн мөнгийг аймаг, сумын Засаг дарга Иргэдийн төлөөлөгчдийн хуралдаанаараа хэлэлцүүлж батлуулдаг, ямар ч эрх мэдэлгүй. Эцсийн дүндээ сум орон нутгийн эрх мэдлийг дээш нь ингэж авсаар байгаад сумын сургуулийн жижүүрээр хэнийг томилохыг Улаанбаатар хотоос шийддэг болсон. Хөдөөгийн хөгжлийг чөдөрлөж байгаа зүйл бол энэхүү томилгоо. Тиймээс бид томилгооны эрх мэдлийг орон нутагт шилжүүлэх зайлшгүй шаардлагатай гэж үзэн, хуулийн төсөл өргөн мэдүүлэхэд бэлэн болсон” гэлээ.
Г.ХОРОЛ
Сэтгэгдэл бичих