Нийтийн тээврийн салбарын парк шинэчлэлийн хүрээнд БНХАУ-ын “Yutong Bus” компанийн үйлдвэрлэсэн их багтаамжийн 600 автобусыг өнгөрсөн гуравдугаар сарын 1-нээс үйлчилгээнд нэвтрүүлсэн. Тэгвэл есдүгээр сарын 27-ноос 31 ширхэг угсраа автобусыг оруулж ирлээ. Одоогоор эхний ээлжийн автобусууд “Таван шар-Офицеруудын ордон” чиглэлд үйлчилгээнд явж байгаа.
Шинэ урт автобусны үйлчилгээ, чанарын талаар Нийтийн тээврийн бодлогын газрын дарга Д.Отгонжаргал, “Шинэ урт автобусны нийт багтаамж 125 ба түүнээс дээш хүн тээвэрлэх хүчин чадалтай, 41 суудалтай. Хөдөлгүүрийн хүчин чадал их, 18 метр урттай, 15 ба түүнээс дээш халаалтын системтэй, хяналтын камераар тоногложээ. Манай орны цаг агаарт тохирсон хасах 45 хэмд хөлдөхгүй, зундаа агааржуулагчтай. Хөгжлийн бэрхшээлтэй иргэнд зориулсан тусгай шат, иргэд орох, буухад зориулсан дохиоллын системтэй, гадна болон урд зорчих хэсэг рүү харсан камертай. Төлбөрийн олон төрөлт карт ашиглаж болно. Жишээлбэл, цахимаар цэнэглэсэн апплейкшн, арилжааны банкны бүх төрлийн картаар үйлчлэхээс гадна гадаад улсын иргэн виза картаа ч уншуулах боломжтой.
Замын-Үүдийн авто замын хальтиргаа гулгаатай холбоотой хөдөлгөөний аюулгүй байдалд тааруулж, автобусыг ээлжээр авчирч байна. Сүүлийн ээлжийн автобусыг Замын-Үүдээс удахгүй авчрах аж. Үйлчилгээнд явж буй өмнөх цэнхэр урт автобуснуудын ашиглалтын хугацаа ирэх оны хоёрдугаар сард дуусах юм. Улаанбаатар хотод явж буй их багтаамжийн 1100 автобус, шинэ 31 урт автобус аль аль нь нэгдүгээр эгнээнд дүрэм зөрчсөн тээврийн хэрэгслийн мэдээллийг дамжуулах системтэй юм.
Шинэ урт автобусуудыг “М:1 Таван шар-Офицеруудын ордон”, “М:2 Зунжин худалдааны төв-МУБИС-Сүхбаатарын талбай”, “М:3 Архивын ерөнхий газар-120 Мянгат-Сүхбаатарын талбай” буюу иргэд олноор зорчдог чиглэлд үйлчилгээнд явуулахыг НЗДТГ-ын ХМОНХХ мэдээлжээ.
Сэтгэгдэл бичих