Монголын кино урлагийн зөвлөл өнөөдөр /2024.09.27/ ээлжит бусаар хуралдаж, "Баавгай болохсон" уран сайхны киног Оскарын шагнал гардуулах ёслолын Гадаад хэл дээрх шилдэг киноны төрөлд эх орноо төлөөлөн оролцох шийдвэрийг гаргажээ. Найруулагч П.Золжаргалаас энэ талаар тодруулахад "Кино урлагийн зөвлөл шийдвэрээ эргэн харсанд баяртай байна. Уг нь Оскарын анхан шатны шалгаруулалтад оролцох л хүсэлтэй байсан юм. Гэтэл эх орондоо байхдаа ийм асуудалтай тулгарна гэж бодсонгүй.
Дэмжсэн үзэгчдэдээ маш их баярлалаа. Одоо албан ёсны шийдвэрээ биеэр очиж авахаар явж байна" гэв.
Энэ жилийн Оскарын шагнал гардуулах ёслолд эх орноо төлөөлөн оролцох сонгон шалгаруулалтад найруулагч П.Золжаргалын "Баавгай болохсон" кино, найруулагч Ж.Сэнгэдоржийн "Чимээгүй хотын жолооч" кино оролцсон. Зөвлөлийн хуралд нийт найман гишүүн оролцож, "Чимээгүй хотын жолооч" киног 5:2 буюу таван хүний саналаар дэмжигдсэн юм. Энэ киноны зохиолыг Кино урлагийн зөвлөлийн гишүүн Т.Номуунзул бичсэн учраас ашиг сонирхлын зөрчилтэй гэж үзэн, хасагдсан. Харин "Баавгай болохсон" киног олонх гишүүн дэмжихгүй учраас аль аль нь эх орноо төлөөлөн оролцох боломжгүй болоод байсан юм.
Сэтгэгдэл бичих