Өмнөд Солонгосын ерөнхийлөгч асан Мүн Жэ Ин одоогийн ерөнхийлөгч Юн Сук Ёлын засаг захиргааг буруутгав. Тодруулбал, 1950-1953 оны Солонгосын дайнаас хойш Солонгосын хойгт хамгийн аюултай байдлыг үүсгэлээ гэж Юны засаг захиргааны Умардад чиглэсэн бодлогыг шүүмжилжээ.
Мүн Жэ Ин албан тушаалынхаа он жилүүдэд дипломат арга барилаар энх тайвныг эргүүлэн авчрах бодлого баримталдаг байсан. Хойд Солонгосын удирдагч Ким Жон Унтай байгуулсан хамтарсан тунхаглалын зургаан жилийн ойд зориулсан хэвлэлийн бага хурлын үеэр Мүн эл шүүмжлэлийг хэлжээ.
Тэрбээр "Юны засгийн газар энх тайвныг хүчээр уриалж, яриа хэлэлцээнээс татгалзсанаар нөхцөл байдлыг улам дордуулж байна. Хойд Солонгостой итгэлцэл бий болгож, яриа хэлэлцээ хийх гэсэн өмнөх засгийн газруудын оролдлого юу ч биш болсон. Юны засгийн газар нэгдэх санаагүй гэдгээ удаа дараа илэрхийлж байна. Солонгосын хойгийн эргэн тойронд хүйтэн дайны байдал эрчээ авч байна. Өмнөд Солонгос үүнийг даамжруулах бус тэнцвэртэй дипломат бодлого явуулж, энх тайвныг зуучлагч байх ёстой" гэжээ.
Хамтарсан тунхаглалын хүрээнд хоёр Солонгосын цэргийн хурцадмал байдлыг бууруулах хэд хэдэн алхам хийхээр тохиролцсон ч Умардын өдөөн хатгалгаас улбаатайгаар Юны засаг захиргаа энэ арга хэмжээг зургадугаар сард зогсоосон. Тиймээс Солонгосын хойг ямар ч үед цэргийн мөргөлдөөн гарч болзошгүй аюултай байдалд байгааг Мүн Жэ Ин онцолжээ. "Яг одоо Солонгосын хойг иргэний дайнаас хойших хамгийн аюултай байдалд байна" гэж тэр хэлэв.
АНУ-ын ерөнхийлөгчийн сонгуулийн дараа тус улсын шинэ засаг захиргаа Хойд Солонгостой яриа хэлэлцээгээ сэргээхийг эрмэлзэж магадгүй гэж Мүн Жэ Ин үзэж байна. Ийм зүйл тохиолдлоо гэхэд Өмнөд Солонгос өмнөх шигээ гадуурхагдах ёсгүй аж. Мүн Жэ Иний үед Дональд Трамп, Ким Жон Ун нартай гурван удаа дээд хэмэжэний уулзалт хийж байв. Гэвч Умардын цөмийн зэвсгийн хөтөлбөрийг устгах талаар тохиролцоонд хүрч чадаагүй. Энэ удаад Умардыг хэлэлцээрт эргэн орохыг Мүн уриалжээ.
Эх сурвалж: YONHAP
Сэтгэгдэл бичих