ОХУ-ын ерөнхийлөгч Путин Даваа гаригт Тува дахь Кызыл хотын дунд сургуулийн сурагчдад лекц тавижээ. Тэрбээр энэ үеэр гэр бүлийнхнийхээ тухай ярьж, ач, зээ нар нь хятадаар чөлөөтэй ярьдагийг дурдсан байна.
"Хятадад ч бас орос хэлийг сонирхогсод нэмэгдсээр байгаа. Манай гэр бүлийн гишүүд, тэр дундаа багачууд хятадаар чөлөөтэй ярьдаг. Гэлээ гээд бид англи хэлийг сонирхохоо болино гэсэн үг биш. Англи хэл бол гайхамшигтай хэл. Англи хэл нь хүн төрөлхтөнд мэдлэг, соёлыг нэгтгэх гэх мэт маш олон зүйл өгсөн. Бид юуг ч хориглохгүй, бидэнд дайсагнасан хэл гэж байхгүй, дайсан улс ч гэж байхгүй. Оростой олон зууны турш дайтсаар ирсэн зарим улсад бидэнтэй сөргөлдөгч элитүүд бий" гэж Путин хэлжээ.
Оросын ерөнхийлөгчийн хувийн амьдрал, гэр бүл нууцлагдмал байдаг. Түүнд анхны эхнэр Людмила Шкребневагаас төрсөн Мария Воронцова, Катерина Титонова нэртэй хоёр охин бий. Людмила, Путин нар 2013 онд салжээ. Улмаар 2017 онд Путин ярилцлага өгөхдөө өвөө болсон гэдгээ хэлсэн юм. Гэхдээ чухам хэдэн ач, зээтэй нь тодорхойгүй.
Сэтгэгдэл бичих