"Эх хэлний дархчууд" сэдэвт эрдэмтэн зохиолчдын гар бичмэл, хөрөг болон гэрэл зураг, ном бүтээлийн дээжээс бүрдсэн үзэсгэлэн энэ сарын 1-нээс Үндэсний номын сангийн шинэ салбарын үзэсгэлэнгийн танхимд гарч эхэллээ.
Үзэсгэлэнгийн нээлтэд Соёл, спорт, аялал жуулчлал, залуучуудын яамны газрын дарга Б.Сэргэлэн, Үндэсний номын сангийн захирал Б.Ичинхорлоо, Хөдөлмөрийн баатар, Ардын уран зохиолч Т.Галсан, "Болор цом"-ын эзэн, яруу найрагч Ш.Лхамноржмаа, Ардын уран зохиолч Ш.Дулмаа агсны охин н.Уранчимэг болон Сүхбаатар дүүргийн Ерөнхий боловсролын II сургуулийн 11в ангийн сурагчид оролцов.
Үзэсгэлэнд Б.Ринчен, Ш.Лувсанвандан, Д.Чойжилсүрэн, Д.Нацагдорж, Т.Галсан, Ш.Дулмаа, С.Дашдооров, Ш.Сүрэнжав, Д.Цоодол, П.Бадарч, До.Нямаа, Д.Урианхай, Х.Чилаажав, А.Эрдэнэ-Очир, Л.Мягмарсүрэн, Ш.Лхамноржмаа, А.Лхагва нарын эрдэмтэн, зохиолчийн гар бичмэл, уран сайхны хөрөг, ном бүтээл болон МЗЭ-ийн зурагчин н.Бат-Очирын 1990-ээд оны эхээр буулгасан 380 гаруй хальснаас түүвэрлэсэн 400 гаруй зургийг дижитал хэлбэрт хөрвүүлэн, дэлгэсэн байна.
Жил бүрийн есдүгээр сарын 1-нд тохиодог "Эх хэлний өдөр"-ийн хүрээнд гаргасан уг үзэсгэлэн энэ сарын 13-ныг хүртэл олны хүртээл болох юм.
Сэтгэгдэл бичих