Боловсролын яамнаас салбарын цахим системүүдийг цэгцлэх, хоорондын уялдаа, мэдээлэл солилцоог сайжруулж, мэдээлэл технологийн нэгдсэн интерфэйс архитектурыг боловсруулах ажлын хэсгийг байгуулж, ажлаа эхэллээ.
Боловсролын үйлчилгээг цахимаар үзүүлдэг 30 орчим систем нь хоорондоо уялдаагүй, замбараагүй байгаа нь хэрэглэгч багш, сурагч, эцэг эх, асран хамгаалагчдад цахим дарангуйлал мэт төвөг учруулдаг. Иймд сургууль, багш, сурагч, эцэг эх, асран хамгаалагчийн хэрэгцээ шаардлагыг хангах байдлаараа өрсөлддөг зах зээлийн зарчмыг бий болгохыг зорьж байгаа аж.
Дээрх ажлын хэсгийг Боловсролын сайдын зөвлөх Д.Гантулга ахалж, бүрэлдэхүүнд нь төр, хувийн хэвшлийн 40 гаруй төлөөлөл багтсан байна. Ажлын хэсэг нь боловсролын салбарын үйлчилгээг задлан шинжилж, үр дүнд нь нэгдсэн ойлголтод хүрч, төр, хувийн хэвшлийн хариуцах үйлчилгээ, ажиллах зарчмыг зааглаж, тодорхой болгох юм. Ингэхдээ зах зээлийн шударга өрсөлдөөнийг дэмжиж, монгол инженерүүд шинийг санаачлах, дэлхийн технологийг нутагшуулах, сэтгэн бодох, бүтээх эрх чөлөөг хангахыг тус яам мэдээлжээ.
Сэтгэгдэл бичих