Ирэх есдүгээр сарын 1-нээс орон нутгийн тээврийн хэрэгсэл нийслэлд 48 цагаас дээш хугацаанд зорчвол хоног тутамд 5000 төгрөг төлөх шийдвэр гарсан. Энэ шийдвэр ирэх Ням гаригаас үйлчилж эхэлнэ.
Улаанбаатар хотод зорчих тээврийн хэрэгслийн тоог бууруулах зорилгоор НИТХ-ын 2024 оны хоёрдугаар сарын 8-ны өдрийн тогтоолоор авто зам ашигласны төлбөрийн хэмжээг шинэчлэн баталсан.
Тодруулбал, уг тогтоолд орон нутгийн тээврийн хэрэгсэл нийслэлд 48 цаг буюу хоёр өдөр зорчвол 1000 төгрөг төлнө. Харин 48 цагаас дээш хугацаанд зорчвол хоног тутамд буюу 24 цаг тутамд 5000 төгрөг төлөхөөр шийдвэрлэсэн юм. Уг тогтоол гурав хоногийн дараагаас хэрэгжих аж.
Энэ талаар хотын дарга Х.Нямбаатар "Нийслэлийн замын хөдөлгөөний түгжрэлийг бууруулах, гэр хорооллыг орон сууцжуулах хуулийн төслийг бид өнгөрсөн намар УИХ-аар батлуулсан. Уг хуулийн хүрээнд зарим нэг захиргааны шийдвэрүүд гарахаар хуульчлагдсан. Орон нутгийн дугаартай машин хотод 48 цагаас илүү зорчсон тохиолдолд хураамж авна гэдэг зохицуулалт ирэх есдүгээр сарын 1-нээс үйлчилж эхэлнэ.
Улаанбаатар хот Монгол Улсын нийгэм, эдийн засгийн төв учраас хөдөө орон нутгаас хот руу чиглэсэн урсгал маш их. Тухайлбал малчид мал болон малын гаралтай түүхий эд, мах, махан бүтээгдэхүүн борлуулах, бизнес эрхлэгчид бараа татах зэрэгт энэ зохицуулалт үйлчлэхгүй. Харин хөдөө орон нутгаас орж ирээд машинаараа такси үйлчилгээ эрхэлж буй иргэдэд үйлчилнэ. Такси үйлчилгээ эрхэлж болно. Гэхдээ түгжрэлд оруулж буй нөлөөллийг нь бууруулах үүднээс энэ зохицуулалтыг хийж байгаа.
Бид цаашид түгжрэлийг бууруулах үүднээс хиймэл оюун ухаанд суурилсан камерын нэгдсэн системийг ашиглалтад оруулахаар ажиллаж байна. Үүний гол зорилго нь замын хөдөлгөөний дүрэм зөрчиж буй үйлдлийг бууруулахад чиглэнэ. Хотын авто замын сүлжээг нэгдсэн хяналтад оруулж байгаа гэж ойлгож болно. Мөн татвар, торгуулиа цаг тухайд нь төлөх соёлыг нэвтрүүлэх зорилготой юм" гэсэн билээ.
Сэтгэгдэл бичих