Усанд сэлэлтийн олон улсын хэмжээний мастер Б.Энххүслэнтэй АНУ-ын Невадагийн их сургуулиас холбогдож, тус сургуульд тэтгэлэгтэй суралцахыг санал болгосон байна.
Б.Энххүслэн Тайланд дахь дэлхийн усан спортын “Таняпура” сургалтын төвд “Усан спортын тэтгэлэгтэй тамирчны хөтөлбөр”-т гурван жил хамрагдсан. Тэгвэл энэ удаа АНУ-д суралцахаар болж байна. 2014 оноос хэрэгжүүлж эхэлсэн уг тэтгэлэгт хөтөлбөр нь олон улсад хүлээн зөвшөөрөгдсөн спортын амжилт гаргасан ч дотооддоо бэлтгэл, сургуулилалт хийх хангалттай нөхцөлгүй тамирчдад санхүүгийн болон техникийн туслалцаа үзүүлдэг хөтөлбөр ажээ.
Б.Энххүслэнгийн хувьд 28 зай, төрөлд Монгол Улсын дээд амжилт эзэмшдэг. 50, 100, 200, 400, 800 метрийн чөлөөт сэлэлт, 100 метрийн өврөөр даллах, 100 метрийн эрвээхэй сэлэлт, 200 метрийн ганцаарчилсан сэлэлтийн төрлөөр Монгол Улсын дээд амжилтыг эвдсэн. Мөн 50, 100 метрийн араар даллах, 50 метрийн эрвээхэй, 200 метрийн эрвээхэй сэлэлтийн төрөлд үндэсний дээд амжилтын эзэн юм.
АНУ-д тэтгэлэгтэй суралцах болсон талаараа М.Энххүслэн ярихдаа, “Невадагийн их сургууль надтай холбогдож, тэтгэлэгтэй суралцахыг санал болгосон. Миний үр дүнг хараад намайг хүлээж авсанд маш их баяртай байна. АНУ-руу нүүх нь миний хувьд том сорилт болно. Гэр бүлээсээ хол байгаа ч шинэ зүйл сурч, туршлага хуримтлуулахдаа баяртай байна. Дэлхийн усан спортын тэтгэлэггүйгээр би одоо байгаа байрандаа байхгүй байсан” гэв.
Сэтгэгдэл бичих