Японы инженерүүд дэлхийд анхны болох модон хиймэл дагуулыг зохион бүтээж дууссан тухай Киотогийн их сургууль мэдээлжээ.
“ЛигноСат” гэж нэрлэсэн уг хиймэл дагуулыг Киотогийн их сургуулийн эрдэмтэд болон модны аж ахуйн “Сүмитомо Форестри” компанийн инженерүүд 2020 оны дөрөвдүгээр сараас хойш бүтээсэн байна. Мод бол экологийн цэвэр материал бөгөөд агаар мандалд бүрэн шатаж, хортой ул мөр үлдээдэггүй тул япон инженерүүд байгаль орчинд ээлтэй хиймэл дагуул бүтээх төслийг эхлүүлжээ. “ЛигноСат” нь 10 см-ийн ирмэгтэй, 4-5.5 мм-ийн зузаан талуудтай, 1 кг жинтэй, шоо дөрвөлжин хэлбэртэй хиймэл дагуул юм. Хиймэл дагуулд нарны хавтан суурилуулсан байна.
Уг хиймэл дагуулыг угсрахдаа Японы модон эдлэл хийх уламжлалт аргыг ашиглажээ. Тодруулбал, хадаас, эрэг гэх мэт бэхэлгээний хэрэгслүүд, цавуу ашиглалгүй угсарсан байна. Төхөөрөмжийг сансарт туршсан гэдгийг япон инженерүүд онцолжээ. “ЛигноСат”-ыг энэ онд “СпэйсИкс” компанийн пуужингаар тойрог замд гаргах төлөвтэй байна.
Сэтгэгдэл бичих