Дэлхийн хэмжээнд нийт улс орнуудын өр 2023 онд 97 их наяд ам.долларт хүрч, дээд амжилт тогтоосныг НҮБ мэдээллээ.
Үүний гуравны нэг нь хөгжиж буй орнуудад ногдож байна. Тодруулбал, хөгжиж буй гурван улс тутмын нэг нь эрүүл мэнд, боловсрол, цаг уурын үйл ажиллагаа зэрэг хүний хөгжилд чухал ач холбогдолтой хөтөлбөрөөс илүүтэйгээр хүү төлөхөд хөрөнгө зарцуулдаг. Хөгжиж буй орнуудын өрийн хэмжээ 2010 онд дэлхийн нийт өрийн 16 хувийг эзэлж байсан бол өнгөрсөн онд 30 хувь болж өсчээ.
НҮБ-ын Худалдаа, хөгжлийн агентлагийн мэдээлснээр засгийн газруудын өрийн хэмжээ 2022 оноос хойш 5.6 их наяд доллараар өссөн. Тус агентлаг "Өрийн ертөнц" нэртэй тайландаа, өндөр хүүгийн төлбөр нь улсын үндсэн зардлын өсөлтөөс давж байгааг онцолжээ. Мөн "Хөгжиж буй орнууд өр төлбөрөө төлөх үү, ард түмэндээ үйлчлэх үү гэсэн сонголт хийх ёсгүй. Цэцэглэн хөгжсөн ирээдүйн төлөө олон улсын санхүүгийн архитектур өөрчлөгдөх ёстой" гэж тайланд дурджээ.
Тайланд дурдсанаар, АНУ өнгөрсөн онд 33 их наяд гаруй ам.долларын өрийн хэмжээгээрээ дэлхийд тэргүүлжээ. Харин Хятад 15 их наяд, Японд 10.6 их наяд ам.долларын өртэйгөөр удаалсан байна. Цаашилбал, Египет, Мексик, Бразил, Энэтхэг улсууд хамгийн их өртэй хөгжиж буй орнуудын тоонд багтжээ.
Эх сурвалж: GLOBAL NEWS
Сэтгэгдэл бичих