Уур амьсгалын Ногоон сангийн санхүүжилтээр БОАЖЯ, ХХААХҮЯ хамтран НҮБ-ын Хөгжлийн хөтөлбөрийн дэмжлэгтэйгээр “Монгол орны хөдөөгийн иргэдийн уур амьсгалын өөрчлөлтөд дасан зохицох чадамж болон эрсдэлийн менежментийг боловсронгуй болгох нь” (АДАПТ) төсөл хэрэгжүүлж байна.
Төслийн хүрээнд баруун бүсийн 5 аймгийн 250 гаруй хоршоологч, малчдын төлөөллийг хамруулсан “Баруун бүсийн үйлдвэржилт ба хоршоод” сэдэвт зөвлөгөөнийг Ховд аймагт зохион байгуулж байна.
Зөвлөгөөнд оролцогчид цаг агаарын гамшигт үзэгдлийг хамтын хүчээр даван туулах, нөлөөлөлд суурилсан зудын эрсдэлийн урьдчилсан мэдээлэлд тулгуурлан төлөвлөлт хийх, малчдын бүлэг, хоршоодын давуу тал, боломж, төрийн бодлогын талаар хамтран хэлэлцэж, сайн туршлагаа хуваалцлаа.
Цас, шороон шуурганы мэдээг малчдад шуурхай, ойлгомжтой байдлаар хүргэж байна.
АДАПТ төслийн хүрээнд малчдын уур амьсгалын өөрчлөлтөд дасан зохицох, байгалийн гамшигт үзэгдлийг даван туулах чадавхыг нэмэгдүүлэх зорилгоор уламжлалт цаг агаарын мэдээллийг нөлөөлөлд суурилсан урьдчилсан мэдээлэл шилжүүлж байна. Тодруулбал:
- малчдад эрт сэрэмжлүүлэх мэдээг ойлгомжтой, шуурхай хүргэх,
- мэдээнд суурилсан төлөвлөлтийг сайжруулах,
- гамшигт үзэгдлийг хамтын хүчээр хохирол багатай даван туулах,
- малчдын хоршоо, нөхөрлөлийн үйл ажиллагааг дэмжих юм. Дээрх чиглэлээр хийж буй үйл ажиллагааг зөвлөгөөнөөр танилцуулав.
Мал, мал аж ахуйн бүтээгдэхүүнийг “Нэг цэг”-ээр дамжуулан борлуулах, шилмэл сүрэг бий болгож малын чанарыг сайжруулах ажлыг туршилтын байдлаар төсөл хэрэгжиж буй 4 аймагт малчдын бүлэгтэй хамтран хэрэгжүүлж байна.
“Монгол орны хөдөөгийн иргэдийн уур амьсгалын өөрчлөлтөд дасан зохицох чадамж болон эрсдэлийн менежментийг боловсронгуй болгох нь” (АДАПТ) төслийг Ховд, Завхан, Дорнод, Сүхбаатар аймагт хэрэгжүүлж байна.
Сэтгэгдэл бичих