“Монгол нутаг дахь буган чулуун хөшөө” нэгдсэн үзэсгэлэн Монголын Үндэсний музейд өнөөдөр нээлтээ хийлээ.
Энэхүү үзэсгэлэн арванхоёрдугаар сарын 15-н хүртэл олон нийтэд нээлттэй аж.
Буган чулуун хөшөө нь Монгол нутагт оршин буй хүрлийн үеийн өвөрмөц дурсгал бөгөөд Төв Азийн нүүдэлчдийн ертөнцийг үзэх үзэл, урлаг, шүтлэг бишрэл, тэдний нийгэм, аж ахуй, овог аймаг хоорондын харилцаа холбоо зэрэг олон талт ой санамжийн асар их мэдээллийг агуулсан, дахин давтагдашгүй, хосгүй үнэт өв юм.
2023 оны есдүгээр сард ЮНЕСКО-ийн дэлхийн өвийн жагсаалтад Монгол Улсаас шинээр бүртгэгдсэн “Буган чулуун хөшөө, хүрлийн үеийн холбогдох дурсгалууд”-ыг олон нийтэд таниулах, түгээн сурталчлахад чиглэж буй тус үзэсгэлэнд Монголын Үндэсний музейн сан хөмрөгийн үзмэрээс гадна Занабазарын нэрэмжит Дүрслэх урлагийн музей, Байгалийн түүхийн музей, Монголын Уран Зургийн Галерейн үзмэр цуглуулгаас дээжлэн нийт 100 гаруй биет үзмэрүүд дэлгэгдэж байна.
Түүнчлэн буган чулуун хөшөө тэдгээрт холбогдох гэрэл зургуудыг Монголын Үндэсний Музейн ЭША Ч.Баяндэлгэр, Ж.Баярсайхан (Ph.D), ШУТИС-ийн багш С.Бат-Эрдэнэ (Ph.D) нарын бүтээлээс дэлгэжээ.
Үзэсгэлэнд буган хөшөөний дүр дүрслэл, онцлог хийцийг дижитал технологи VR, AR төхөөрөмжөөр үзэх боломжтой. Мөн хөгжлийн бэрхшээлтэй иргэдэд зориулсан тайлбартай, боловсролын хөтөлбөр, буган чулуун хөшөөг судалсан эрдэмтний олон нийтэд зориулсан лекц, сэдэвчилсэн тайлбарт аялал, гэр бүлийн хөтөлбөр зэрэг арга хэмжээг тэгш хүртээмжтэйгээр нийтэд толилуулах юм байна.
Үзэсгэлэнгээс бэлтгэсэн фото сурвалжилгыг хүргэж байна.
ФОТО:
Сэтгэгдэл бичих