Монголын тамирчид 1964 оны Токиогийн олимпийн наадамд анх оролцож, 1968 оны Мехсикийн наадмаас анхны медалиа авч байлаа. Гэхдээ 2008 оны Бээжингийн зуны XXIX олимпийн наадам хүртэл аваргын алтан медалийг монголчууд хүлээж суусан. Хүлээлт өндөр байсан 2008 оны наймдугаар сарын 14-н монголчуудын хувьд түүхэн баярын өдөр тохиосон юм. Энэ өдрийг эргэн дурсаж Олимпийн алт, мөнгө, ДАШТ-ий хүрэл медальт, Хөдөлмөрийн баатар, Гавьяат тамирчин Н.Түвшинбаярын амжилтыг эргэн сануулъя.
Хэдийгээр тэрбээр одоо хорих ял эдэлж байгаа ч нэгэн цагийн амжилт нь монголчуудын сэтгэлд үргэлж тодоор дурсагдана. Тиймдээ ч хүмүүс цахим хуудастаа алдааг нь өмөөрөхгүй ч аваргын алдрыг үгүйсгэхгүй хэмээн бичиж буй.
15 ЖИЛИЙН ӨМНӨ МОНГОЛ АНХ УДАА ОЛИМПООС "АЛТАН МЕДАЛЬ" АВЧ БАЙВ
Эргэн сануулбал, 2008 оны наймдугаар сарын 14.
Жүдо бөхийн тэмцээний зургаа дахь өдөр эрэгтэйчүүдийн 100 кг-ын жинд Н.Түвшинбаяр эхний барилдаанаа Японы бөх К.Сүзүкитэй хийх байсан юм. Түүний сугалаа хүнд байсан бөгөөд “Афин 2004” олимпийн аварга, 2003, 2005 оны дэлхийн аварга цолтой бөхтэй таарсанд хэн ч ялна гэж итгээгүй. Тиймээс жүдо бөхийн төрлөөс монголчууд медальгүй буцах нь тодорхой боллоо гэцгээж байсан. Гэтэл дэвжээнд гарсан Н.Түвшинбаяр Сүзүкиг цэвэр ялж, улмаар Герман, БНСУ, Азарбайжаны бөхчүүдийг дараалан ялж финалд гарч ирсэн. Энэ үед л түүнд итгэсэн монголчууд мөнгөн медаль биш аваргын алтан медалийг хүсч байлаа.
Н.Түвшинбаяр Казахстаны Асахат Житкиевийг үнэлгээгээр илүүрхэн ялж, олимпийн аварга болсон түүхтэй. Энэ медаль монголчуудад үнэ цэнтэй ирсэн.
2008 оны наймдугаар сарын 14-ий үдэш монголчууд баяраа Сүхбаатарын талбайд тэмдэглэж байлаа. Бээжингийн наадмаас буудлагын О.Гүндэгмаа мөнгөн медаль хүртэж, боксын төрлөөр Э.Бадар-Ууган олимпийн аварга болж, Сэрдамба мөнгөн медальтай ирж билээ. Мөн Паралимпийн наадмаас байт харвааны төрөлд Д.Баатаржав аваргын алтан медалийг хүртсэн юм.
Сэтгэгдэл бичих