Дэлхийн дулаарлыг зогсооход Хятад улс гол үүрэг гүйцэтгэхээр байгааг шинэ судалгаа харуулав


6-р сарын 30
15 цаг 00 минут

Хятад улсад нар, салхины эрчим хүчний үйлдвэрлэл эрчимтэй нэмэгдэж байгаагаас дэлхий дахины хүлэмжийн хийн ялгарлыг бууруулах зорилт хугацаанаасаа өмнө биелж болзошгүйг өчигдөр нийтлэгдсэн шинэ судалгааны тайланд өгүүлжээ.

Тус улсын зөвхөн нарны эрчим хүчний үүсгүүрийн өсөлт нь 2025 он гэхэд дэлхийн дахины нийт багтаамжийг 85 хувиар нэмэгдүүлэх тооцоо гарсан байна.

Ерөнхийдөө Хятад улсын 2030 онд хүрэхийг зорьж буй сэргээгдэх эрчим хүчний шилжилт таван жилийн өмнө хэрэгжихээр байгааг уг тайланд өгүүлжээ.

Гэхдээ үүнтэй зэрэгцэн нүүрсээр ажилладаг эрчим хүчний үүсгүүрүүд ч бас нэмэгдэх тооцоо гарсан байна. Эдгээр нь голдуу нар, салхины үүсгүүрийн ард нөөц байдлаар ажиллах гэнэ.

Дэлхийн дулаарлын нэг гол шалтгаан болж буй хүлэмжийн хийн ялгарлыг бууруулах үйлсэд Хятад улс гол үүрэгтэй гэж судлаачид үздэг.

Тус улс нь дэлхийн хамгийн том нүүрсний хэрэглэгч бөгөөд голдуу эрчим хүч үйлдвэрлэх зорилгоор ашигладаг юм.

Нүүрсний хэрэглээ нь Хятад улсын нийт ялгаруулдаг нүүрстөрөгчийн давхар ислийн 69 орчим хувийг бүрдүүлдэг.

Дээрх судалгааг Global Energy Monitor (GEM) хараат бус эрдэм шинжилгээний байгууллага гүйцэтгэжээ. Энэ байгууллагын судалгааны материалыг Дэлхийн Банк, Олон Улсын Эрчим Хүчний Агентлаг зэрэг байгууллагууд болон засгийн газрууд өргөнөөр ашигладаг юм.

Уг судалгааны тайланд өгүүлснээр Хятад улсын нарны эрчим хүчний үүсгүүрийн багтаамж яг одоо дэлхийн бусад бүх улсуудынхыг нийлүүлснээс их байгаа гэнэ.

Салхины эх үүсгүүрийн багтаамж нь 2017 оноос хойш хоёр дахин өссөн байна.

2025 онд нар, салхины үүсгүүрийн багтаамж нь өнөөдрийнхөөс хамгийн багадаа хоёр дахин нэмэгдэх тооцоо гаргажээ.

Ингэснээр одоогийн дэлхийн нийт нарны үүсгүүрийн багтаамжийг 85 хувиар, салхины үүсгүүрийн багтаамжийг 50 хувиар өсгөх юм байна.

Хятад улс нь одоо нарны эрчим хүч цуглуулагч хавтангийн үйлдвэрлэлээр дэлхийд тэргүүлж, үнэ өртгийг нь амжилттай бууруулж байгаа.

Засгийн газар нь дотоод зах зээлдээ сэргээгдэх эрчим хүчний шилжилтийг урамшуулах бодлого явуулж байгаа нь үүнд бас нөлөөлжээ.

Өнгөрсөн онд нар, салхины эрчим хүчний үйлдвэрлэлд дэлхий даяар хагас их наяд гаруй ам.доллар зарцуулсны 55 хувь нь Хятад улсад оногдсон байна.

Хятадын төрийн тэргүүн Ши Жиньпин 2030 он гэхэд нар, салхины эрчим хүчний үйлдвэрлэлийн багтаамжаа 1,200 Гигаваттаас дээш хүргэх зорилтыг 2020 онд зарлаж байжээ.

Тэгвэл энэ зорилт хугацаанаасаа таван жилийн өмнө биелэхээр байгааг дээрх судалгаа харуулсан байна.

 

Эх сурвалж: BBC

АНХААРУУЛГА: Уншигчдын бичсэн сэтгэгдэлд turleg.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан бөгөөд мөн IP хаяг ил гарсан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл бичих



Шинэ мэдээ

“Орчин үеийн хүүхдэд тохирсон хүүхдийн хөгжлийн үйлчилгээтэй болно”5 сар 8. 20:01Норовлин суманд гарсан ойн түймрийг унтраахаар ажиллаж байна5 сар 8. 20:00Иргэдийн фейсбүүк хаягт нэвтэрч, 1 өдрийн дотор 6 сая төгрөг залилжээ5 сар 8. 20:00“Бүхнийг фронтод, бүхнийг ялалтад зориулсан” монгол түмэн5 сар 8. 19:59Эрдэнэтчүүд утаагүй, түгжрэлгүй хот хэвээр үлдэх төлөвлөлтөө гаргаж, шийдлүүдээ танилцууллаа5 сар 8. 19:571000 инженер төслийн хоёр дахь үе шат эхэллээ5 сар 8. 19:55Хөгжлийн банкны дүрмийн санг 1.5 их наяд төгрөгөөр нэмэгдүүлнэ5 сар 8. 19:54НДС-ын 700 тэрбум төгрөгөөс 108 тэрбумын өгөөж хүртэнэ5 сар 8. 19:54Монгол Улсын Ерөнхийлөгч У.Хүрэлсүх, ОХУ-ын Ерөнхийлөгч В.В.Путин нар албан ёсны уулзалт хийлээ5 сар 8. 19:53АНУ, Их Британи улсууд тарифын хэлэлцээ хийнэ5 сар 8. 19:52Удирдлагын академийн захирал сард 56 сая төгрөгийн цалин авч байна5 сар 8. 19:51133 кардинал шинэ папын төлөө саналаа өгч эхэллээ5 сар 7. 23:01
© 2025 он. Зохиогчийн эрх хуулиар хамгаалагдсан.