Олон Улсын Худалдааны Төв Монгол Улсын үндэсний экспортын шинэ стратегийг боловсруулахад дэмжин ажиллаж байна

Монгол Улсын Ерөнхийлөгчийн ивээл дор болж буй Дэлхийн экспортыг дэмжих чуулга уулзалтын албан ёсны нээлт өнөөдөр боллоо. 

Чуулга уулзалтыг нээж Монгол Улсын Ерөнхийлөгч У.Хүрэлсүх үг хэллээ. Тэрбээр өнөөдөр тохиож буй “Дэлхийн бичил, жижиг, дунд үйлдвэрлэгчдийн өдөр”-ийн баярын мэндийг чуулга уулзалтад оролцогч зочид төлөөлөгч нарт дэвшүүлээд, дэлхий нийтээр сорилт, бэрхшээлтэй тулгарч буй хүнд хэцүү, ээдрээтэй цаг үед улс орнууд Тогтвортой хөгжлийн зорилтоо хэрэгжүүлэхэд ногоон болон цахим худалдаа, экспортыг хөгжүүлэх нь чухал юм гэдгийг онцоллоо.

Монгол Улсын Ерөнхийлөгч У.Хүрэлсүх дэлхийн худалдаа, эдийн засгийн харилцааг илүү ногоон, органик, цахим байдлаар төрөлжүүлж, дэвшилтэт технологи, инновац нэвтрүүлэн, үйлдвэрлэгчид, баялаг бүтээгчдэдээ шинэ боломж нээж, өрсөлдөх чадварыг нэмэгдүүлж, тэгш боломж олгох шаардлагатай байгааг дурдлаа. Түүнчлэн Улаанбаатарт болж буй Дэлхийн эксортыг дэмжих 20 дахь удаагийн чуулга уулзалтаар асуудлын гарц шийдлийг хэлэлцэж, ажил хэрэгч санал, санаачилга гарган, дуу хоолойгоо нэгтгэн НҮБ-ын Далайд гарцгүй хөгжиж буй орнуудын асуудлаарх Гуравдугаар бага хуралд танилцуулна гэдэгт итгэлтэй байгаагаа илэрхийлсэн юм.

Памела Кок-Хамилтон: Дэлхий нийтэд цахим, ногоон худалдаанд шилжих үйл явц өрнөж байна.

Далайд гарцгүй хөгжиж буй орнуудын зөвлөлдөх уулзалтаар эхэлсэн Монгол Улсын Ерөнхийлөгчийн ивээл дор болж буй Дэлхийн экспортыг дэмжих чуулга уулзалт хоёр дахь өдрөө “Худалдааг ногоон, дижитал, органик болгон төрөлжүүлэх” сэдвээр үргэлжилж байна.

Чуулга уулзалтыг Монгол Улсын Ерөнхийлөгчийн Тамгын газар болон Монгол Улсын Засгийн газартай хамтран зохион байгуулж буй НҮБ-ын харьяа Олон Улсын Худалдааны Төв /ОУХТ/-ийн гүйцэтгэх захирал, хатагтай Памела Коук-Хамилтон чуулга уулзалтын хоёр дахь өдрийн хэлэлцүүлэг дээр үг хэлсэн юм. Тэрбээр, дэлхийн худалдааны өнөөгийн чиг хандлага олон бэрхшээл, сорилт бүхий цаг үетэй тулгарч байна. Ялангуяа дэлхий даяар тэгш бус байдал нэмэгдсээр байгаа энэ нөхцөлд хүртээмжтэй байдлыг эрхэмлэх үүднээс хөгжил дэвшлээ даган ашиглах дижитал буюу цахим болон ногоон худалдаанд шилжих зэргээр өнөөг хүртэл явж ирсэн худалдааны арга замыг өөрчлөх үйл явц өрнөж буйг тэмдэглэн хэлж, үүнд ОУХТ бичил, жижиг, дунд бизнесийнхнийг дэлхийн цахим худалдаанын сүлжээнд нэгтгэх, нэгдэх боломжийг нэмэгдүүлэх чиглэлээр анхаарч ажиллаж байна гэсэн юм.

Мөн ОУХТ Монгол Улсын үндэсний экспортын шинэ стратегийг боловсруулахад дэмжин хамтран ажиллаж байна гэдгийг хатагтай Памела Коук-Хамилтон хэлсэн үгэндээ онцоллоо.