Хан-Уул дүүргийн гуравдугаар хороо, ТЭЦ-3-ын урд Лавай төвийн уулзварын баруун хойд талын ногоон байгууламж дээр хууль бусаар барилга барих гэж байгаа гэх асуудлыг тус дүүргийн ИТХ-ын төлөөлөгч Б.Жагараас тодрууллаа.
Энэ талаар тэрбээр "Тухайн газрыг хотын дарга асан Э.Бат-Үүлийн үед нэр бүхий ААН-д хууль бусаар эзэмшүүлсэн бөгөөд ногоон байгууламж хэвээр авч үлдэх саналыг оршин суугчид хэлж байгаа.
Газар эзэмших, ашиглах гэрчилгээ олгохдоо Газрын тухай хуулийн холбогдох заалтыг зөрчсөн. Тус хуулийн 4.1-т төрөөс газрын талаар баримтлах зарчмыг заасан байдаг. Үүнд газар өмчлөх, эзэмших, ашиглахад шударга ёс, тэгш байдлыг хангах зарчмыг тусгасан.
Хан-Уул дүүргийн гуравдугаар хорооны нутаг дэвсгэрт хамаарах тухайн газрын доор дулаан, бохирын шугам бий. Мөн төв зам дагуу байршилтай бөгөөд ногоон байгууламж бүхий нийтийн эзэмшлийн талбай юм. Гэтэл хууль бус захирамжаар газар олгосон.
Төв зам дагуу газар олгоход дулааны шугам хэдэн метрийн зайтай байх, ногоон байгууламжтай эсэхийг нь тооцдог. Өөрөөр хэлбэл, нийтийн эзэмшлийн ногоон байгууламжтай газар дээр олгож болохгүй. Гэтэл хэн нэгэн эрх мэдэлтэн нь нийтийн эдэлбэр газрыг эзэмших гэрчилгээг бусдад олгодог асуудал байна" гэлээ.
Сэтгэгдэл бичих