Тогтвортой хөгжлийн боловсролыг цаашид хэрэгжүүлэх үндэсний нөөц бүрджээ

Байгаль орчин, нийгэм, эдийн засгийн хариуцлагатай, хүртээмжтэй ирээдүйг бий болгоход дэмжлэг үзүүлэх “Тогтвортой хөгжлийн боловсрол-2” төслийг манай улсад хэрэгжүүлээд байна. Төсөл хэдийгээр дуусч байгаа ч цаашид үүнийг үргэлжлүүлэн нутагшуулах боловсон хүчин, хүний нөөц Монгол Улсад бүх түвшинд бүрджээ.

Энэ талаар Байгаль орчны мэдээлэл, сургалтын төв (БОМСТ)-ийн гүйцэтгэх захирал Э.Шинэцэцэг өнөөдөр “Туушин” зочид буудалд болсон “Тогтвортой хөгжлийн боловсрол-2” төслийн үйл ажиллагааны үр дүнг хэлэлцсэн уулзалтын үеэр мэдэгдлээ.

Тэрбээр хэлэхдээ, хүний нөөц сургуулийн сурагчаас эхлээд судлаач хүртэл гурван түвшинд бүрдэхээс гадна сургалтын сэдэв, агуулга, контент зэрэг арга барил, үйл ажиллагаа зэрэг хэрэглэгдэхүүний нөөц мөн бүрдээд буйг тодотголоо. Энэ нь Тогтвортой хөгжлийн боловсролыг үндэсний түвшинд цааш хэрэгжүүлэхэд мэдлэгийн бааз суурь бэлэн болоод байна гэсэн үг. Жишээ нь, төсөл хэрэгжсэн 30 сургуульд бий болгоод буй ТХБ-ын загварыг хаана ч нутагшуулах схемийг нэгэнтээ бүрдүүлснийг тэмдэглэн хэлж байна.

Энэ талаар БОАЖЯ-ны Хүрээлэн буй орчны бодлого, зохицуулалтын газрын дарга Ц.Уранчимэг хэлэхдээ, “Бид ТХБ төслийн эхний шатанд байгаль орчин, тогтвортой хөгжлийн олон улсын стандартуудыг нэвтрүүлж ажилласан. Ингэсний үр дүнд одоо төслийн хоёр дахь шатанд тэдгээр стандартыг төрийн бүх байгууллагад нэвтрүүлэхэд бэлэн болоод ажиллаж байна” гэв.

“Тогтвортой хөгжлийн боловсрол-2” төслийн үйл ажиллагааны үр дүнгийн талаар төслийн хэрэгжилтийг санхүүжүүлэгч байгууллагын нэг (нэг нь Монгол Улсын Засгийн газар юм) Швейцарийн Хөгжлийн агентлагийн Хамтын ажиллагааны газрын дэд дарга Бенуа Меэйр-Биш хэлэхдээ, ерөнхийдөө төсөл Тогтвортой хөгжлийн боловсролын стандарт, олон улсын шалгуур үзүүлэлтүүдийг ханган биелүүлснийг дурдаад, Монгол Улс ТХБ-2 төслийг хэрэгжүүлэх явцад сургуулийн буюу боловсролын сэтгэл зүйч нарыг бэлтгэн ажиллуулж эхэлснийг сайшааж байлаа. Энэ талаар төслийн зөвлөх, Монголын Сэтгэл зүйчдийн нийгэмлэгийн доктор багш Ш.Батсүх, ЕБС-уудад анх удаа мэргэжлийн сэтгэл зүйч нар, ментор багш нарыг мэргэшүүлэн бэлтгэн гаргаж мониторинг судалгаа хийх нөхцөл, гарын авлага материалаар хангаж өгснийг тодотгож хэлэв. Үүний үр дүнд төслийн хүрээнд бэлтгэсэн 64 сэтгэл зүйч ЕБС-иудад ажиллан улсын хэмжээнд нийт сурагчдын 20 хувийг сэтгэл зүйн зөвлөгөөнд хамруулаад буйг онцоллоо. 

Монгол Улс “Тогтвортой хөгжлийн боловсрол-2” төслийг 2019 оны 6 дугаар сараас 2022 оны 6 дугаар сар хүртэлх хугацаанд хэрэгжүүлж дуусаад байна.