Тайланд улс ирэх оны нэгдүгээр сарын 1-ний өдрөөс эхлэн гадаадын иргэдэд эмчилгээний урт хугацаатай виз олгодог болох юм.
Уг визийн хураамжийг жилийн өмнө 6,000 бат байхаар ярьж байсан бол Тайландын засгийн газар 5,000 бат ($140) болгон бууруулах шийдвэрийг өчигдрийн хуралдаанаараа гаргажээ.
Эмчилгээний виз нь гадаадын иргэдэд нэг жилийн дотор олон удаа Тайландын нутаг дэвсгэрт орох, гарах эрх олгох ба нэг удаадаа 90 хүртэл хоног саатах боломжтой байх гэнэ.
Визийн хүсэлт гаргагч нь эмнэлгийн баталгаа, эрүүл мэндийн даатгал, доод тал нь 800,000 батын эмчилгээ хийлгэх санхүүгийн чадвартайгаа нотлох шаардлагатай юм байна.
Зүүн Өмнөд Азийн хоёр дахь том эдийн засагтай Тайланд улс цар тахлын дараа эрүүл мэндийн аялал жуулчлалын дэлхийн томоохон төв болох зорилт тавиад байгаа.
Эмчилгээний визийг эрүүл мэндийн тодорхойлолт дээр үндэслэн цааш сунгах боломжтой байхаар журамлажээ.
Ийм визийг зүрх судас, хорт хавдар, эрхтэн шилжүүлэн суулгах, хөгшрөлтийн эсрэг болон гоо сайхны мэс засал хийлгэх хүсэлтэй өвчтөнүүдэд олгох юм байна.
Эх сурвалж: Bloomberg
Сэтгэгдэл бичих