Монгол Улсын Ерөнхий сайд Л.Оюун-Эрдэнэ өчигдөр хийсэн цаг үеийн мэдэгдлийнхээ үеэр сэтгүүлчдийн асуултад хариулахдаа Хөгжлийн банкны зээлдэгчийн өмнөөс Монгол Улсын Засгийн газар ямар ч өр төлөхгүй гэдгээ онцгойлон мэдэгдсэн. Мөн тэрбээр шударга бус байдалтай эвлэрэхгүй, мөнгө угаах гэмт хэргийн шинжтэй үйлдэл хэмээн харж байгаагаа ч илэрхийлсэн юм.
Хөгжлийн банкны бондын өр төлөлт энэ жилээс эхэлж байгаа, Монгол Улсыг хөгжүүлэх, эдийн засгийн ашигтай байх төсөл хөтөлбөр танилцуулж гадаадаас босгосон их хэмжээний өрийн асуудал сөхөгдөх нь гарцаагүй. Энэ өрийг хэрхэн төлөх вэ гэдэг асуулт олон хүнд байгаа энэ үед Монгол Улсын Засгийн газар биш зээлдэгчдээр өрийг нь төлүүлнэ гэж мэдэгдсэн нь манайд шударга ёс үндсэн утгаараа оршиж эхлэх нь гэсэн найдварыг олон хүнд төрүүлжээ.
Олон нийтийн сүлжээнд Хөгжлийн банкны зээлдэгчдийн өрийг “Өөрөөр нь төлүүлье” хаштаг бүхий уриалга өчигдрөөс хүчээ авч, эрх мэдэл албан тушаалаа ашиглан бусдын боломжийг хулгайлсан улстөрчидтэй тэмцэхийг уриалсаар байна. Хэвлэл мэдээллийн салбарынхан болон иргэний нийгмийн төлөөллүүд, улс төрийн намын зарим удирдлагууд ч Хөгжлийн банкны өрийг “Өөрөөр нь төлүүлье” уриалгад нэгдэж, зээлийг зориулалт бусаар зарцуулсан аж ахуйн нэгжүүд, тэдэнтэй хамаарал бүхий улстөрчдөөс шударга ёс, тэгш боломжийг шаардаж эхэлсэн юм. Хөгжлийн банкны найдваргүй зээлтэй холбоотой асуудал олны анхааралд орж ирснээр зээлийн эргэн төлөлт сайжирч, зарим улстөрчдийн хамаарал бүхий компаниуд авсан зээлээ 100 хувь төлснөө зарлаад байна. Зарим эх сурвалжилийн мэдээлснээр 50 гаруй тэрбум төгрөгийн зээлийг сүүлийн хоногуудад эргүүлэн төлжээ.
