Дэлхий нийтийг түгшээсэн цар тахлын аюул улс оронд маань нүүрлэсэн энэ өдрүүдэд харин ч бид азтай хүмүүс юмаа гэж бичсэн коммэнт, пост нүүр номоор үе үе үзэгдэнэ. “Үнэхээр азтай юмаа”, “яагаад гээч”. Дэлхий нийтэд, томоохон улс орнууд хэрхэн цар тахлын аюулд өртөж, зовлон бэрхшээл туулж байгаа тухай мэдээ үзэх төдий л мэдээлэлтэй, нүүр тулсан аюулгүй, цар тахлын аюулаас ангид багагүй хугацааг туулсан.
Дэлхий даяар аюулыг сөрөн тэмцсэн олон саруудад Монголчууд эх орноороо хөндлөн гулд зугаалж, баяр цэнгэл тэмдэглэн өнгөрүүлсэн. Улс оронд маань тахал тархаж эхэлсэн ч бид хайнга хэвээр л байна. Зарим улс оронд вакцины сонголт ярих байтугай хэзээ урьдчилсан сэргийлэх тарилгатай болохыг таашгүй нөхцөлд дэлхийн 7 тэрбум хүний хэд нь байгаа бол?
Харин Монголчууд вакцинаа хийлгэснийхээ төлөө, өөрийнхөө эрүүл мэндийн төлөө тарилга хийж байгаа цэгт очсоныхоо төлөө төрөөс 50 мянган төгрөгийн урамшуулал авна гээд бод доо. Хамгийн сайн вакцин аль вэ гэдэг асуултад эрдэмтэн докторууд “хамгийн түрүүнд олдсон нь” гэж дуу нэгтэй хариулж байна.
Хаа нэг олон нийтийн сүлжээнд таарсан коммэнт энэ тэрхэнд, эзэнгүй мэдээлэлд итгэж, шинжлэх ухааны, дэлхийн эрдэмтдийн эсрэг тэрслүү үг чулуудаж суугаа нэгэн нь ч байна. Вакциныг шинжлэх ухааны ололт гэж хүлээн авдаг, дөнгөж төрсөн нялхсаас эхлээд л урьдчилсан сэргийлэх тарилга хийлгэсээр ирсэн шинэ цагийн иргэд гэж өөрсдийгөө ойлгодог хүн та энэ цаг үед яах ёстой гээч. Өөрийнхөө төлөө, гэр бүлийнхээ төлөө, улс орныхоо төлөө, идэвхтэй амьдралдаа эргэж орохын төлөө цаг алдалгүй вакциндаа хамрагдаарай гэж уншигч таныг уриалж байна.
