Дархан-Уул аймгийн Засаг дарга С.Насанбат 2019 оны 10 дугаар сарын 21-25-ны өдрүүдэд Испанийн Вант Улсын Астуриас мужийн урилгаар тус мужид ажиллаж, эдийн засгийн хувьд томоохон ач холбогдол бүхий санамж бичиг, гэрээг амжилттай байгуулжээ. Айлчлалаар дараах 3 асуудалд харилцан дэмжлэг үзүүлэхээр тохиролцсон байна.
Нэгдүгээрт, арьс ширний цогцолборыг Дархан-Уул аймагт байгуулах чиглэлээр хамтран ажиллахаар болсон байна. Монгол Улсын Ерөнхийлөгчийн санаачилга, дэмжлэг дор манай аймагт арьс ширний цогцолборыг байгуулахаар Хонгор сумын нутаг дэвсгэрт “Дархан арьс ширний цогцолбор”-ын барилгын ажил эхэлжээ...
Энэ удаагийн айлчлалаар дамжуулан арьс ширний аж үйлдвэрийн нэгдсэн төвийн хөрөнгө оруулалтын асуудлыг шийдвэрлэх 3 том санамж бичигт аймгийн Засаг дарга гарын үсэг зуржээ. Төслийн хүрээнд цэвэрлэх байгууламж бүхий 15 томоохон үйлдвэр ашиглалтад орж урьдчилсан байдлаар 7740 гаруй шууд ажлын байрыг нэмэгдүүлэхээр тооцоолсон байна.
Уулзалтын үеэр Испанийн талаас АНУ-ын гуравдагч оронтой хийх гадаад худалдааны бодлогын хүрээнд Монголд үйлдвэрлэсэн бүтээгдэхүүнийг АНУ-ын зах зээлд гаргах сонирхолтой байгаа гэдгээ илэрхийлсэн байна.
Хоёрдугаарт:, Эрчимжсэн мал ажуй, худалдаа, аялал жуулчлалын хамтын ажиллагааг хөгжүүлэхээр талууд харилцан тохиролцжээ. Астуриас мужийн захирагчтай хийсэн уулзалтын үеэр Дархан-Уул аймгаас Астуриас мужид гаргах боломжтой бүтээгдэхүүний талаар ярилцаж санал солилцсон. Тухайбал зөгийн бал, чацаргана зэрэг бүтээгдэхүүнийг тус мужид нийлүүлэх талаар судалж эргэн хүсэлтээ явуулахаар болсон байна.
Гуравдугаарт:, Олон жил царцаад байгаа томоохон үйлдвэрүүд тухайлбал мах, сүүний үйлдвэрт хөрөнгө оруулалтыг хийх боломжийн талаар Испани Улсдаа тэргүүлэх хөрөнгө оруулалтын АCS группийн удирдлагуудтай уулзаж, энэ хүрээнд Дархан-Уул аймаг дахь ХАҮТ-аар дамжуулан хөрөнгө оруулалтын төслүүдээ бэлтгэх үүргийг аймгийн Засаг даргаас бодлогын хэлтсийн дарга нарт чиглэл өгчээ. Дээрх салбараас гадна боловсрол, эрүүл мэнд, нэн ялангуяа спортын чиглэлд хамтран ажиллах боломж нээлттэй байгаа талаар уулзалтын төгсгөлд онцолсон байна.
Сэтгэгдэл бичих